A la paciente, con un severu problema medular que-y robó la movilidá, mangáron-y la cadarma esterna y pudo dar unos pasos. Los presentes, ente ellos un grupu de médicos y enfermeres del serviciu de Rehabilitación, arrincaron una ovación. 

Asocedió'l miércoles de la selmana pasada, pela mañana, na cuarta planta del Hospital Universitariu Central d'Asturies (HUCA). El contestu d'esti fechu inusual yera una xornada de rehabilitación robótica por aciu d'esoesqueletos. Esta última palabra, esoesqueletu, designa una especie d'armadura esterna o robótica que s'asitia nes estremidaes y que fai posible nueves capacidaes de movilidá. Ente otres aplicaciones, constitúi una ferramienta de sofitu pa los pacientes con mancadura medular grave, altamente incapacitados y que riquen ayuda pal so procesu de rehabilitación. 

Ún de los centros españoles que yá tien incorporáu esti tipu d'inxenios ye l'Hospital Nacional de Parapléxicos, asitiáu en Toledo. Nel momentu actual, los diversos fabricantes d'estos artefactos altamente sofisticaos tán dándolos a conocer n'hospitales d'asistencia xeneral. Nel casu del HUCA, esta demostración fíxose nel marcu d'una xornada entamada pol serviciu de Rehabilitación y Medicina Física del centru sanitariu uvieín y la Sociedá Asturiana de Medicina Física y Rehabilitación (Samefyr), en collaboración cola empresa diseñadora d'un esoesqueletu denomináu “Atalante”. 

La xornada desenvolvióse'l miércoles de la selmana pasada pela tarde, ya incluyía una demostración de rehabilitación de la marcha con un esoesqueletu. Pero yá pela mañana se fixo una prueba con una paciente del HUCA. Los aplausos retrañieron en tola planta cuarta. 

Nun convien xenerar mires infundaes. Tolo contao nun quier dicir que l'HUCA yá incorporara un esoesqueletu robotizáu. Les autoridaes sanitaries echaron sobre l'asuntu una capa trupa de secretismu. Ello ye, que'l programa de la citada xornada fuera espublizáu na páxina web del HUCA y, hores depués, foi borráu. Lo qu'indiquen les fontes sanitaries consultaes por esti periódicu ye que'l preciu de los diversos tipos de esoesqueletu ye mui eleváu. Naturalmente, cualquier pasu alantre esixiría una rigorosa comparanza ente les distintes ufiertes, ya inclusive determinar si escoyer l'alquisición clásica o una fórmula de renting o asemeyada.