Bimenes demuestra que nel mediu rural tamién se puede diseñar tecnoloxía punta. D'ello dio cuenta esti día la empresa Ati, que presentó al conseyeru de Ciencia ya Innovación, Borja Sánchez, el so nuevu modelu d'ascensor con intelixencia artificial, qu'identifica al usuariu al traviés de la imaxe y recibe ordes de voz. Un elevador que tamién inclúi otres anovaciones, como sensores de temperatura, humedá y CO2, o sistemes de prevención d'un posible fallu por aciu d'un analís de datos tamién conocíu como big data. 

“L'añu pasáu presentamos un ascensor que funcionaba cola voz y, agora, axuntamos la reconocencia facial. Sicasí, vistímoslu con más tecnoloxía, como paneles solares pa que seya autónomu o pa que cuando frene rexenere la corriente, el famosu kerch de Fernando Alonso”, esplica Yonatan Sierra, responsable de la empresa. El nuevu ascensor tamién puede controlase col móvil, lo que dexa que “cuando tas llegando a casa puedes llamalu pa que vaiga baxando”, detalla Sierra. 

Na visita, el Conseyeru destacó la importancia de desenvolver nuevos productos con tecnoloxía anovadora en probando'l nuevu elevador, que recibió financiamientu al traviés del Institutu de Desenvolvimientu Económicu del Principáu d'Asturies (Idepa). Y, nesi sen, espera que “oxalá qu'haya más proyectos como esti n'Asturies”. “Que nun sía un exemplu aislláu”, espresó Sánchez, percontentu cola evolución del proyectu que “incorpora sensórica y piensa yá nel big data”. 

Sánchez probó l'ascensor xunto al investigador Carlos Rodríguez y l'alcalde de Bimenes, Aitor García, quien punxo enfotu en que l'anovación presentada por Ati “ye una demostración de que les empreses asturianes rurales tán a la vanguardia como les de cualesquier otra parte”. Un arguyu pal conceyu, qu'espera que la empresa siga con esta gran evolución.