Romper cola idea natural de que'l ser humanu ta nel cumal pa entender que la intelixencia artificial yá tien un papel dominante. Ye la propuesta que treslladen los artistes Ángeles Nuño y Román Torre en “Scala Naturae”, una instalación que foi galardonada col V premiu del Muséu Barjola, y que foi inaugurada esti día na capiya del espaciu d'arte xixonés. 

“En toles reproducciones de la escala natural poníase nel cumal al home, como ser superior. Pero lleguemos a esta realidá d'agora, na que los algoritmos son los que resuelven situaciones de la vida cotidiana, como si puedes acceder a un pisu. Deciden por una serie de valores que nun llegamos a entender, anque los llegamos a creer”, esplica Ángeles Angulo sobre esta obra, que zarra l'añu nel Barjola. 

L'artista esplica lo que va atopar el públicu: “Pensamos na capiya, como si fora l'armazón d'un ordenador, pa que cuando l'espectador entre como un caronchu vea como un mapa de bits, y l'ordenador lo que fai ye traducir de cutio unos testos ellaboraos por intelixencia artificial. Y el mesmu ordenador prinda otra vuelta estos bits, y tradúzlos pa imprimilos”, describe, enantes de matizar tamién que'l movimientu de xente pola capiya tamién va alteriar esos mensaxes que s'imprimen: “Nesos momentu va quedar constancia, nun se va repitir esi testu clonáu continuu, va haber como una alteración y van salir otres palabres”. 

Román Torre, candasín, ye'l so compañeru nesta aventura que conxuga arte y tecnoloxía. “La idea ye poner en cuestión esa idea antropocéntrica de la escala”, cuenta. “Hai materiales sintéticos que nos tán arrodiando, que se tenga un pocu de consciencia de qu'estos entes nun tienen nin siquier por qué corresponder a lo que buscamos. Ye como lo qu'asocede coles redes sociales, que yá se sabe qu'hai munches interacciones y ‘m gusta’ fechos por robots”, destaca. 

Ángeles Angulo y Román Torre, que formen Rotor Studio, afiten el so trabayu na creación de dispositivos físicos a mediu camín ente l'artesanía dixital, el diseñu industrial y la esperiencia audiovisual, dando llugar esta hibridación de técniques a formatos mui diversos que parten de llugares comunes.