Ensin falta de fibra óptica, un ganaderu podría xeolocalizar les sos vaques, un llabrador podría controlar la temperatura de los sos cultivos y un conceyu podría asitiar una rede intelixente d'usu d'agües. Tou eso va ser posible bien llueu n'Asturies cola estensión de la rede LoRa (significa: llargu algame) per tol territoriu rexonal. Esta tecnoloxía, na que va entamar el Principáu desenvolviendo un proyectu pilotu a primeros d'añu, encóntase nel famosu internet de les coses (IoT). Esto ye, que dexa interconectar oxetos cotidianos con internet pa tomar decisiones y xestionar meyor. “La nuesa intención ye llevar l'internet de les coses a empreses y conceyos y asitiar a Asturies a la cabeza del país nesti ámbitu”, afirma'l director xeneral d'Anovación, Investigación y Tresformamientu Dixital, Iván Aitor Lucas. Ello ye qu'hasta agora solo Baleares tien en marcha un proyectu asemeyáu al del Principáu. 

La rede LoRa va tar abierta a cualquier usuariu y funciona d'un xeitu asemeyáu a una wifi de llargu algame. Fai posible conexones inalámbriques nuna estensión d'hasta 20 kilómetros y, amás, consume poca enerxía. “Empiézase por esparder esta rede nes nueses torres de TDT porque ye lo más fácil. Anque depués la idea ye dar cobertoria a tol territoriu rexonal. Amás, va estendese perrápido, nun ye como'l 4G. Ye casi enchufar y poner”, esplica Iván Aitor Lucas. Pa funcionar, a esta rede fai-y falta una antena que facilite la señal y una serie d'emisores inalámbricos interconectaos que van recibir y van procesar los datos qu'apurren esos sensores. LoRa lo que permite, a última hora, ye conectar dispositivos o máquines, de forma qu'ente elles puedan intercambiase pequenes cantidaes de datos a baxa velocidá. 

Según el director xeneral de la Conseyería de Ciencia, Anovación y Universidá, esta tecnoloxía va abrir na rexón “un cientu d'oportunidaes”. Iván Aitor Lucas pon dellos exemplos: “Pa xeolocalizar a los animales d'una ganadería o monitorizar si salen d'una determinada corralada; pa crear una rede intelixente d'usu d'agües o d'enerxía nun pequenu conceyu; pa saber cuántes places d'aparcamientu queden llibres nuna ciudá o pa saber si los contenedores de basura tán enllenos; pa controlar la temperatura de los paneles del miel; pa realizar controles medioambientales de calidá del aire o de l'agua...”. L'Alministración autonómica va ser la primera n'esplotar l'internet de les coses al traviés d'un proyectu pilotu que la Conseyería ta diseñando xunto cola cátedra d'empresa Thin5G. 

Sicasí, Ciencia insiste en qu'el so oxetivu ye llevar la rede LoRa “a otros ámbitos”. N'especial, a conceyos, instituciones y empreses por que puedan crear les sos propies redes d'emisores y sensores y facer les midíes que necesiten. La gran industria tamién podría beneficiase, avanzando na so hipersensorización. “Por exemplu, una máquina apararía ella sola primero de rexistrar una avería pa camudar una pieza determinada. D'esti xeitu, aforraríense costos”, remata Lucas.