Rober tien 44 años, un cáncer gástricu con metástasis hepática y unes ganes lloques por vivir. “Tar enfermu nun implica nun tener vida”, insiste cada vez que tien ocasión. Y esi calter batallador, del que siempre busca una salida enantes d'entretenese colos problemes empobinólu escontra una misión solidaria. Cola bicicleta como forma d'espresión, la iniciativa qu'encabeza, #Robercontraelcáncer, lleva recaudaos más de 36.000 euros n'apenes añu y mediu. Tol dineru, destináu íntegramente a la investigación sobre'l cáncer gástricu. 

“Lo más importante ye l'aceptación. Tocóme a mi porque sí. Lo siguiente ye normalizalo y aprender a convivir con ello”, cuenta con naturalidá José Roberto González García, el protagonista d'esta hestoria a LA NUEVA ESPAÑA. La d'él ye una historia de superación a pedalaes. 

El golpe pa Rober llegó n'abril de 2019, unos meses depués de que lu intervinieren de dos hernies discales lumbares. Llevaba dellos meses de cansanciu, fatiga y debilidá cuando, tres unes prebes, diéron-y la peor noticia: adenocarcinoma gástricu en cardias. Un cáncer que, amás, estendiérase al fégadu. “Les posibilidaes yeren poques pero fui dar cola mio salvadora: la doctora Paula Jiménez Fonseca (exalumna, como él, del colexu San Ignacio). Ensin ella nun taría equí”, esplica Rober. 

Foi la doctora la que-y faló d'un ensayu clínicu al que se sometió darréu. Y equí ye onde entra la bici: en terminando la quimio, tenía de facer exerciciu aeróbicu. Rober, que tenía una tienda-taller de bicicletes en Grau dende 2012, escoyó'l ciclismu. “Empecé a poco y a poco, con un amigu, con rutes curties y afayaíces. Pero un día fiximos una etapa de 80 kilómetros y al llegar a Grau diximos ‘pos casi tamos pa llegar a Cuadonga…’”, comenta, primero de revelar cómo siguió la conversación: “¿A que nun los hai?”. 

Y vaya si los había. Porque, en consultándolo cola doctora, Rober completó la etapa ente Grau y Cuadonga: más de 110 kilómetros. Una ruta que repitió en xunu de 2021, el segundu retu. Dambos envueltos nun motivu solidariu: donar dineru a la Fundación Seom (Sociedá Española d'Oncoloxía Médica). Colos 14.239,50 euros del primer retu creóse la primer beca d'investigación contra'l cáncer gástricu. Una fazaña. 

“El día de la entrega de la donación, la mio parte representaba'l 1% del total. Sentíame como una formiga ente empresarios de gran nivel, pero el reconocimientu que me fixeron foi emocionante. Entré midiendo 1,79 y cuando salí llegaba a los 2 metros”, cuenta con gracia l'asturianu. “Dicíenme que lo mío tenía un valor doble como paciente oncolóxicu: nun ye solo'l dineru pa la beca, tamién ye un exemplu d'engarradiella contra la enfermedá”, añede. 

A los retos solidarios nun tardaron en sumase más iniciatives: maillots, camisetes, gorres, alcuerdos con empreses como Verdú, farmacia La Corredoria, De la Uz, mázcaros, sorteos ente los sos siguidores en redes sociales… Les coses fueron tan bien que'l segundu retu, el de 2021, lleva recaudaos cerca de 22.000 euros. Y l'asturianu sigue vendiendo'l so merchandising al traviés de les sos redes sociales. 

A Rober quéden-y entá batalles per delantre: “De cara a 2022 quiero repitir el retu, esta vegada saliendo de Les Regueres, una y bones el Conceyu quixo participar. Y tenemos delles idees más en mente, como una gymkana na que participe tola familia”. Rober, un desboyu d'idees, resume'l so llabor en trés grandes principios: “La importancia de cuidar la investigación, qu'anque teas enfermu tienes una vida per delantre y que si yo soi quien, tu tamién lo yes”.