Los horros yeren l'almacén de les colleches y nesti nuevu sieglu van selo de la memoria del mediu rural d'Asturies. L'Asociación d'Amigos del Horru Asturianu ta desenvolviendo un anovador proyectu pa recuperar tola sabiduría popular y les alcordances venceyaes a estos graneros elevaos que caractericen el paisaxe de los pueblos de la rexón. L'oxetivu ye asitiar pequeñes señales nos horros más destacaos, pola so antigüedá o calidá, onde apaezan códigos QR, de xeitu que gracies al teléfonu móvil pueda aportase a tou tipu d'información sobre esi graneru y, especialmente, a los testimonios grabaos en vídeu de los sos propietarios. Ellos mesmos van contar la hestoria d'esi mueble llevantáu sobre pegollos que, en munchos casos, pasó al tiempu que la de delles xeneraciones de la so familia.
“Queremos combinar la puesta en valor del patrimoniu etnográficu cola recuperación del patrimoniu inmaterial”, esplica l'arqueólogu Fernando Mora Rodríguez, miembru de los Amigos del Horru y responsable d'esti proyectu de rutes interactives pa conocer les meyores amueses d'esti tipu de construcción popular y tamién la vida de los sos propietarios. “Tamos buscando la forma d'asitar una cartelería onde apaezan los códigos QR, que nun sía intrusiva, que tenga poco impactu visual”, esplica Mora. “Discurrimos utilizar códigos QR porque ye una forma fácil, utilizando'l teléfonu móvil, d'aportar a tola información rellacionada col horru que se visite. Porque amás del patrimoniu material hai otru patrimoniu inmaterial bien importante que tenemos que caltener. Atopamos con que munchos de los sos dueños, güei persones mayores, tienen la so vida amestada a esi horru. Dalgún contábanos, por casu, que l'horru fuera la dote de la so güela; otru que lu xugaren nuna partida; otru, que baxaren tola madera cola que se construyó flotando pel ríu Nalón... Esi tipu d'hestories”, esplica Mora. “Nun se ye namás contar el valor de determinaes talles o pintures que tenga esi horru, tamién de recuperar la memoria oral que queda venceyada a la construcción”, añede.
Tán nuna fase inicial de desarrolu del proyectu, pero yá hai dos conceyos interesaos n'habilitar eses rutes d'horros con códigos QR. “Pensamos en facer rutes diseñaes pa facer andando, pa evitar qu'acaben pasando coches pel pueblu y resulten intrusives”, añede. “Queremos fomentar un turismu sostenible, non del que destrúi”. Mora insiste na importancia d'axuntar l'antiguu almacén de les colleches de la casería cola memoria de los sos propietarios. “Los horros son un elementu material importante, pero tamién tán amestaos a la vida de les persones que viven nos pueblos”.
Esti proyectu inscríbese nel gran plan que los Amigos del Horru tienen pa los graneros del norte de la Península: llograr una reconocencia por parte de la UNESCO como Patrimoniu Inmaterial de la Humanidá, un títulu qu'inclúi non solo les construcciones si non tol saber que s'articula alredor d'elles, reflexu d'una forma de vivir y habitar el territoriu. Pa consiguir esta distinción, de la que previsiblemente va disfrutar a mediu plazu la cultura sidrera d'Asturies, los Amigos del Horru crearon una rede de cooperación con otres asociaciones defensores de los horros en Galicia, Lleón, Cantabria y el norte de Portugal, que tamién tienen construcciones asemeyaes. La rede celebra un alcuentru añal y el postreru d'ellos celebróse'l pasáu mes de payares en Candás, al qu'allegaron distintos espertos y representantes d'entidaes promotores de la recuperación d'un patrimoniu etnográficu tan distintivu de les rexones norteñes.
