Cultura dobla los fondos p'ayudes a particulares destinaes al caltenimientu y restauración d'horros y paneres
La Conseyería de Cultura, Política Llingüística y Turismu destina 300.000 euros a les ayudes pa la restauración d'horros y paneres, colo que dobla la cuantía de 2021, añu nel que la Dirección Xeneral de Patrimoniu dedicó a esti fin 150.000 euros.
La convocatoria ta dirixida a particulares y instituciones ensin ánimu d'arriquecimientu que quieran realizar obres de caltenimientu, restauración o rehabilitación d'horros, paneres y cabazos.
Los elementos etnográficos qu'aspiren a les ayudes van tener que tar incluyíos nos catálogos urbanísticos municipales. Los conceyos que nun tengan, van poder optar a la subvención de los elementos anteriores a 1940 que constituyan muestres notables pola so talla, decoración o por formar conxuntos. La cuantía máxima de l'ayuda va ser de 7.500 euros, y nun se van subvencionar actuaciones que perpasen el 75% del presupuestu.
Los gastos subvencionables van ser pa obres realizaes dende'l 1 de payares de 2021 hasta'l 31 d'ochobre de 2022 sufragaes con anterioridá al periodu de xustificación. El plazu de presentación de solicitúes ye de 20 díes naturales a partir de güei, fecha en que se publicó l'estractu de la convocatoria nel Boletín Oficial del Principáu (BOPA).
La Conseyería de Cultura xubió progresivamente les ayudes pa la restauración d'horros y paneres nos últimos años. Asina, de los 100.000 euros destinaos en 2018 y los 125.000 de 2019, pasaron a 150.000 l'añu pasáu, una cifra que se dobla na convocatoria nueva.
Más en N'asturianu
-
Esta será la nueva "ayalga" del Belles Artes que se va ver n'Avilés
-
La meyor música n'español tien temes asturianos: doce artistes nacionales escueyen los sos cantares favoritos
-
La tienra semeya de cuatro hermanos que trunfa nel concursu d'atapeceres d'El Franco (con más de 800 fotos participantes)
-
El paisaxe industrial al traviés de la fotografía de José Ferrero: "Apurre una mirada mui peculiar"