El primer informe d'añu completu realizáu sobre'l volume y el movimientu del sable na playa de San Llorienzu y na desembocadura del ríu Piles, pal que se fixeron seis vuelos con dron ente payares de 2020 y xineru de 2022, revela que los áridos van moviéndose constantemente pela bahía, entrando y saliendo, y que nestos meses ganóse sedimentu, en concretu 4.751,7 metros cúbicos. Pero los datos, coinciden los espertos, conclúin que “fai falta más tiempu d'estudiu pa poder sacar conclusiones sobre la evolución temporal del sable o la detección de dalgún patrón venceyáu a les estaciones y otros factores”. Ye por ello que dende'l Serviciu de Calidá y Vixilancia Ambiental del Conceyu de Xixón va sacase un nuevu contratu'l próximu mes d'abril p'ampliar otros cuatro años esti mesmu estudiu topográficu del principal arenal xixonés, cola idea de caltener nel tiempu estos llabores y asina poder sacar conclusiones.
Dende va yá dellos años faense estudios “puntuales” dende l'área d'Obres Públiques, pero “con poca calidá de precisión”, polo que dende Mediu Ambiente decidió sacase “una asistencia técnica más seria y rigurosa sobre la topografía de la sablera”. Programáronse seis vuelos con drones cada trés meses aprosimao, cuatro d'ellos pa realizar midíes en marea baxa y dos vuelos más en marees vives. Caún d'ellos de trés hores. La superficie inclúi tola bahía de San Llorienzu y la llengua d'arena qu'entra escontra'l ríu Piles. Fixéronse'l 13 de payares de 2020; en 2021 realizáronse'l 2 de marzu, 28 d'abril, 5 de xunetu y 23 de setiembre. El postreru foi'l 18 de xineru. “Los resultaos del primer añu nun son representativos. Vemos que se ganó sable esti añu, pero nun podemos concluyir que la playa tea ganando arena”, reconocen dende'l serviciu de Calidá y Vixilancia Ambiental.
Los llabores axudicáronse a Locis SIGTech, empresa xixonesa qu'ufierta servicios de Consultoría n'ámbitos rellacionaos cola cartografía, los sistemes d'información xeográfica y el mediu ambiente. Col vuelu del dron, d'unes trés hores aprosimao y en díes de bona lluz y ensin lluvia, tomáronse fotografíes en distintos tramos de la sablera pa llograr una nube de puntos tridimensional (puntos de control) por aciu de correlación que permitiera algamar una densidá averada al puntu cada diez centímetros. “La meyora frente a lo que se fixera hasta agora, ye que cuando faes topografía tradicional vas tomando puntos finitos que consideres representativos, pero col dron multiplícase, porque saques una nube de puntos, ello ye que paez una semeya. Depués calcúlense les llínies de nivel”, detalla Christian Robledo Zapico, responsable de la empresa.
Pa esos vuelos establecieron puntos de referencia, tanto nel mesmu paséu del Muru, como nel arenal, amás de les escaleres del paséu. “Utilizamos unos 70 o 80 puntos de referencia que dan mayor precisión. Nel paséu, por casu, utilices puntos finitos, que sabes que siempre tán ehí y márquente la distancia, pero na playa tienes que ponelos tu”, esplica Robledo. A partir d'ende ellaboren l'estudiu pa conocer el movimientu del sable, marcando en collorao tolo que sobresal percima de la cota cero, y que como se reveló apínase debaxo del muru, y n'azul les perdes de sable, ye dicir los pozos que tradicionalmente se formen en San Llorienzu. “La dinámica del movimientu de sable observáu apaez consistente coles conocencies previes, esto ye, apaecen pozos y sumen, especialmente na zona centro y en La Escalerona, que ye lo qu'ún se podía imaxinar, pero agora confirmao con esti estudiu”, detalla Robledo.
Agora, n'apurriendo esti primer estudiu al Conceyu, dende la firma conclúin que “tiénense llograo unos resultaos afayaízos que validen les tecnoloxíes y metodoloxíes propuestes nel proyectu”. Y “que les resultancies considérense precises y válides pa realizar un siguimientu de calidá sosteníu nel tiempu”. “Según vaigamos teniendo datos colos años podrá afondase y establecer patrones”, conclúin los espertos.
