La compañía minera Asturmet, filial asturiana de la británica Technology Minerals PLC, celebra facer plenu coles sos investigaciones pa la busca del apreciáu cobaltu nes mines históriques de la Sierra del Aramu. El director de la firma con sede en Londres, Alex Stanbury, calificó nuna comunicación a los inversores de “bien prometedores” les investigaciones y destacó que nos muestreos atopóse “una mineralización de cobre, colbaltu y níquel d'altu grau”, unes materies primes que busca pa destinar a la fabricación de bateríes. La fiebre del cobaltu, metal que'l so preciu disparóse nel actual contestu bélicu, podría dar una nueva vida a les antigües esplotaciones mineres asturianes. 

Technology Minerals ye un grupu con actividá n'España, Irlanda y Camerún. N'España concéntrase nel Principáu, onde opera al traviés de la irlandesa Aurum. Tien siete permisos d'investigación n'Asturies a nome de la so filial Asturmet Recursos. Nel primeru d'ellos, denomináu Saint Patrick y qu'inclúi terrenes de L.lena, Morcín, Quirós, Riosa y Proaza, ye nel que se llograron resultaos qu'Alex Stanbury calificó de “especialmente satisfactorios”. El restu de permisos siguen en procesu de tramitación, anque nuna comunicación a los sos inversores, la compañía británica confía en consiguilos “bien llueu”. Tolos permisos céntrense na esplotación de cobaltu, níquel y cobre. La prospección del terrén cubre un área de 461 kilómetros cuadraos. El grupu británicu Technology Minerals PLC, amás de na esploración y estracción de minerales, ta especializáu nel recicláu de litiu pa bateríes.

El plan del grupu pasa pela busca de socios empresariales pa formar un consorciu qu'apurra “solidez financiera” a proyectos como'l de la Sierra del Aramu, onde cuenta esparder la primer campaña d'esploración coles mires d'algamar una meyor comprensión del potencial del proyectu de cara a una posible esplotación. Nesta primer esploración, que se realizó'l pasáu payares, recoyéronse 79 muestres, analizaes nun llaboratoriu d'Irlanda, qu'incluyeron 53 soterrañes recoyíes nel nivel 3 de l'antigua mina de cobre. Tamién s'arrexuntaron otres 17 muestres de prospección na llanera de la esplotación. Al tratase d'una antigua mina de cobre, esti metal presentaba les mayores tases. 

Technology Minerals nun ye la única empresa que busca metales pa bateríes nos suelos del Principáu. La empresa australiana Infinity Lithium Corporation ta detrás d'un permisu d'investigación solicitáu en Cabrales y la china Starboard Global Limited d'otru en Cabrales y les Peñamelleres. Technology Minerals amplió en 2020 les sos investigaciones n'Asturies con nuevos permisos nes Cuenques, la Comarca de la Sidra y l'Oriente. El cobaltu ye un metal cada vez más demandáu al ser ún de los componentes básicos de les bateríes d'iones de litiu coles que funcionen los teléfonos móviles, los ordenadores y los vehículos eléctricos. 

Asturmet Recursos llogró en 2018 permisu d'investigación de dellos recursos, ente ellos cobaltu, nun área de 261 cuadrícules mineres na sierra del Aramu, el denomináu Saint Patrick, y a él axuntáronse otros dos, denominaos Saint David y Sant Andrew. El primeru d'ellos afecta a una superficie de 188 cuadrícules mineres en Morcín, Uviéu, Proaza, Quirós, La Ribera y Santo Adriano, y el segundu afecta a una superficie de 286 cuadrícules mineres de los conceyos de Mieres, Morcín, Uviéu y La Ribera. L'añu pasáu solicitó permisos d'investigación n'otres cuatro árees. Ástur A (con 273 cuadrícules mineres en Bimenes, Llaviana, Nava y Piloña), Ástur B (233 cuadrícules mineres en Nava y Piloña), Ástur C (164 cuadrícules mineres en Parres y Piloña), y Ástur D (184 cuadrícules mineres n'Ayer). La Dirección Xeneral d'Enerxía, Minería y Reactivación del Principáu almitió estos cuatro permisos.