La costa del Occidente ye l'área marina d'Asturies con más potencial pa la instalación d'aeroxeneradores flotantes pola calidá del so recursu eólicu. Ente Navia y L.luarca, a 30 kilómetros de la marina, el Ministeriu pa la Transición Ecolóxica identificó, d'un xeitu preliminar, una zona d'usu prioritariu pa la instalación d'eólicos marinos. L'alianza formada por EDP y Engie estudia la instalación ellí del primer parque flotante de la rexón. Los aeroxeneradores taríen conectaos por aciu de cables submarinos cola costa, pero'l problema ye que, una vegada ellí, nun hai infraestructures pa la evacuación de la enerxía. La “autopista” eléctrica Asturies-Galicia traviesa pel interior del Principáu, a 30 kilómetros de la marina.

La falta de conexones eléctriques condiciona'l desenvolvimientu de la eólica marina, considerada pol Gobiernu rexonal como estratéxica pa compensar el zarru de les térmiques de carbón y incrementar la producción anovable. 

Ocean Winds –empresa d'eólica marina participada al 50% por EDP Anovables y Engie, y empobinada pol inxenieru asturianu Bautista Rodríguez– presentó alegaciones al plan de desenvolvimientu de la rede de tresporte d'enerxía eléctrica 2021-2026 que tramitó'l Ministeriu pa la Transición Ecolóxica al considerar que'l documentu nun contaba coles necesidaes de la eólica marina y ello magar qu'el so desenvolvimientu inclúise ente los oxetivos del Plan Nacional Integráu d'Enerxía y Clima 2021-2030. Nes sos alegaciones, Ocean Winds destacó como clave que s'entame la interconexión de la rede de la zona de Navia cola exa d'alta tensión Asturies-Galicia “p'acoyer la xeneración eólica marina prevista nel occidente d'Asturies”. 

El Gobiernu aprobó'l pasáu mes la planificación de redes y pal periodu 2021-2026 nun s'incluyeron proyectos pa favorecer la eólica marina n'Asturies. Sicasí, fontes de Rede Eléctrica d'España, l'operador del sistema, precisaron que “la planificación 2021-2026 tamién numbera dellos proyectos con un horizonte posterior a 2026, que la so construcción nun va dar empiezu nesti periodu, pero que sí pueden avanzar en determinaos trámites alministrativos o nos estudios técnicos y mediuambientales”. En concretu, proxéctase nel futuru la integración d'eólica marina con una nueva subestación de 400 kilovoltios, denominada Abres, na zona occidental d'Asturies y con entrada y salida de la llínía Boimente-Pezós, tramu de la exa d'alta tensión Asturies-Galicia. “Esti proyectu ta en llínia colos planes d'ordenación del espaciu marítimu y les zones designaes como prioritaries pal allugamientu d'enerxía eólica marina”, señalaron fontes de Rede Eléctrica.