Asturies sigue batiendo récords negativos no que se refier al índiz d'avieyamientu. Los datos de 2021 nun tienen más vuelta: Asturies ye, con muncho, la comunidá autónoma con tasa de más población vieya nel país más avieyáu d'Europa. L'índiz d'avieyamientu d'Asturies asitió l'añu pasáu en 231,07. Esi ye'l númberu d'asturianos mayores de 64 años por cada 100 menores de 15 años. Ye casi'l doble que la media nacional, asitiada en 129,11 mayores de 64 años por cada 100 menores de 15. Y solo otres dos rexones superen l'índiz 200: Galicia (207,32) y Castiella y Lleón (204,47). 

El Noroeste ye, por muncho, la zona más avieyada d'España. Porque a les trés rexones yá citaes sígen-yos nel ranking d'avieyamientu Cantabria (165,39) y el País Vascu (158,50). Tamién percima de la media nacional asitien Aragón, con 147,76 mayores de 64 años por cada 100 menores de 15, Extremadura (147,42) y La Rioja (141,22). La Comunidad Valenciana presentó l'añu pasáu'l mesmu índiz d'avieyamientu que la media española, 129,11. Nel otru estremu del ranking apaecen Melilla, con solo 46,23 mayores de 65 años por cada 100 menores de 15, Ceuta (61,69) y la Región de Murcia (90,32). Son les úniques zones d'España que tienen más menores de 15 años que mayores de 64.

Visto d'otru xeitu: el 27 por cientu de la población asturiana tien más de 64 años. Ello ye qu'Asturies tien un índiz d'avieyamientu superior al de tolos países del mundu, incluyíu Xapón, qu'encabeza'l ranking con 214 persones mayores de 64 años por cada 100 qu'entá nun cumplieron los 15. Asina que Xapón ta 17 puntos per debaxo d'Asturies. 

Pero a esa realidá axúntense otres qu'incrementen entá más el problema. Por exemplu, Asturies presenta la segunda tasa de fecundidá (númberu de fíos per muyer) más baxa d'ente toles rexones d'Europa, con 0,88. Solo la supera Canaries, que tien una tasa de 0,88. Otra vuelta nesti puntu destaca negativamente tol noroeste español. Porque Galicia asitia nel cuartu puestu del ranking, con una tasa de fecundidá de 1,02; Cantabria nel sestu, con 1,07; y Castiella y Lleón nel séptimu, con 1,10 fíos por muyer. 

De la mesma, el Principáu rexistra la tasa de natalidá más baxa d'España (5,05 por mil), la de mortalidá más elevada (12,64 por cientu) y la llegada de pocos emigrantes (la población estranxera supon el 4,45 por cientu del total, bien per debaxo de la media española). D'ehí qu'Asturies non solo avieye sinón que se despueble a pasos de xigante: de caltenese l'actual esbarrumbe demográficu Asturies podría perder casi 100.000 habitantes nos próximos 13 años, y más de la metá de la población a finales d'esti sieglu, según les proyecciones de los demógrafos. 

Asturies sumaba 637.801 habitantes nel censu del añu 1900. La población foi incrementándose pasu ente pasu. De los 709.764 habitantes en 1910 pasó a los 779.294 de 1920. En 1930 algamaba yá los 834.553, ente que diez años dempués contabilizábense 869.488 asturianos. Nel censu del añu 1950 rexistráronse 895.804 habitantes, y 994.670 nel de 1960. En dalgún momentu de la década de los sesenta del sieglu pasáu Asturies superó'l millón d'habitantes y en 1970 yá s'algamaren los 1.052.048 habitantes. El censu de 1981 rexistró 1.129.556 habitantes. Dende entós la población nun dexó de menguar hasta llegar a la cifra actual: 1.011.882 habitantes.