El pasáu industrial de la rexón, en 25.000 fotografíes. El Muséu del Pueblu d’Asturies recibió una escepcional donación de negativos de la familia de José Luis Acuña, el popular fotógrafu xixonés fináu en 2008. Son toes imaxes realizaes ente 1960 y 1989 de fábriques, munches d'elles de Xixón y la mayoría yá desaniciaes. Por numberar dalgunes: Avello Puch (de motos), La Asturiana (de lloza de San Cloyo), La Algodonera, SIMCO (de camises), Bernar (oxetos de cocina), Conserves Ojeda, Juliana Constructura Xixonesa (astilleru)... Una selección de setenta d'estes fotografíes proxectóse va unos díes nel equipamientu cultural de Xixón.
La dirección del Muséu del Pueblu d’Asturies, con Juaco López de cabezaleru, fixo pública la donación de José Luis Acuña esti día nel marcu del Día Internacional de los Museos, que se conmemoró'l miércoles pasáu, pero que cuntó con actividaes a lo llargo de tola selmana. Les imaxes, de gran calidá, porque'l so autor “emplegaba cámares profesionales con negativos de gran formatu”, amuesen “mesmo los espacios de trabayu como los productos qu'ellaboraben les fábriques” d'aquella dómina. Estes postreres, afonden, “facíense pa los catálogos, imprescindibles pa la venta de los productos y tamién pa la publicidá”. L'archivu hasta agora secretu d'Acuña dexa conocer, destaquen, “los productos que se fabricaben n'Asturies”: “Son pervalibles les imaxes de muebles, cacíes, cristaleríes, bateríes de cocina y otros munchos oxetos”.
Los negativos contienen fotografíes de les fábriques más importantes de la rexón del periodu 1960-1990. Dalgunes de les industries qu'inmortalizó'l xixonés cola so cámara fundáronse nel sieglu XIX y otres empezaren la so andadura depués de la Guerra Civil. La donación, diz el Muséu del Pueblu, “amuesa la riqueza y diversidá de l'actividá industrial asturiana” de fai más de trenta años. Siderurxa, testil, cristal, lloza, muebles, astilleros, componentes industriales, llagares de sidra, mantega, imprentes, motos, cementu, chicolate, conserves de pescáu, cárniques... Xunto a estes fábriques hai delles fotografíes que reflexen otres actividaes económiques: bancos (especialmente de la Caxa d'Aforros d'Asturies), comercios, constructores, hoteles...
José Luis Acuña Bascones nació en Madrid, pero con 8 años namás aportó a Xixón. El so padre, José Acuña, yera fotógrafu de cai y movíase pel norte d'España. Él siguió los sos pasos. En 1951 abrió'l so propiu estudiu y llaboratoriu na cai Covadonga, onde adulces foi adquiriendo fama como retratista. Nel negociu llegaron a trabayar seis persones. En 1960 empezó a facer fotografía industrial. Les primeres imaxes captoles na Fábrica de Moreda. Acuña tamién foi'l fotógrafu oficial de la construcción de la siderúrxica UNINSA, y de la Feria Muestres d'Asturies.
L'archivu actual ingresa nel Muséu del Pueblu d’Asturies como depósitu de los sos fíos, y ta siendo dixitalizáu gracies a la collaboración del módulu de grabación y tratamientu de datos y documentos de la Escuela Taller de Xixón.
