¿Tien preguntaose cómo captaron los medios imaxes a escasa distancia del volcán de La Palma? ¿De qué xeitu s'intentó rescatar a los cuatro podencos de Todoque, tamién en La Palma, arrodiaos de lava? ¿O quién consiguió la documentación gráfica d'una esfarrapada Popasna (Ucrania) tres el bombardéu del exércitu rusu? Esacto, drones. Estos vehículos aéreos non tripulaos son, tal como los define'l pioneru profesor asturianu de pilotos, José Luis Castaño, “el presente más inmediatu col futuru más prometedor”. Los badagüeyos adelantren que se van convertir nos mensaxeros de confianza pa plataformes como Amazon y d'equí a poco tiempu van tar habilitaos pal tresporte humanu.
Dende'l 1 de xineru de 2021, pa poder pilotar un dron cualesquier que supere los 250 gramos hai que disponer del certificáu oficial de pilotos reconocíu pola AESA (Axencia Estatal de Seguridá Aérea) y Asturies nun quixo quedar a lo último de la modernidá: l'autoescuela Sariegu púnxose a impartir clases pa llograr el control d'estes pequeñes aeronaves. Nesti momentu ye la única que cunta col permisu pa ello y compartelu con otres 26 autoescueles repartíes pola xeografía española.
El mecanismu ye asemeyáu al del carné de conducir: los alumnos tienen de superar una prueba teórica y otra práctica –cola diferencia de que l'esaminador de la postrera puede ser el mesmu tutor–. La parte teórica analiza les característiques d'estos aparatos, según la normativa que los regula; la práctica valora l'aplicación de les riegles y la maña de la persona al mandu. Los requisitos y l'espaciu aéreu pa ponelos en marcha márcales la AESA.
Un perfil heteroxéneu
Pel momento, el perfil del pilotu de drones nun respuende a un patrón concretu. Hai tantos como drones, asegura'l profesor. Dende mozos de 16 años, la edá mínima que se pide, hasta persones xubilaes que la so afición ye la fotografía y disfruten con panorámiques que superen los 100 metros d'altor. Individuos aficionaos y otros que consideren esta formación un emburrión a nivel profesional. Álvaro Ruiz y Carlos Seoane son exemplu d'ello. El primeru tien 20 años y ye un apasionáu del mundu aéreu; el segundu tien 28, dedícase a la comunicación y alcuentra qu'esti certificáu ye de gran utilidá nel mundu llaboral. Dambos “son unos ‘pros’”, según el so arguyosu instructor. Mesmo qu'estos mozos, una ventena d'alumnos pasaron dende finales de 2020 peles sos manes.
“Si se te da bien xugar a la play puedes remanar un dron ensin problema”, promete Ruiz, que los guía como si fueren coches teledirixíos. Pal espectador resulta daqué más imponente, sobremanera cuando asitien a escasa distancia coles hélices en marcha. Seoane tien trés exemplares y dependiendo de les característiques del terrén o la necesidá d'imaxe despega ún o otru. Tamién lo fai como si fora una caxigalina, inclusive al aterrizar sobre yerba con un llargor considerable, daqué que los sensores de la máquina converten nuna dificultosa maniobra.
Nesti casu, l'autoescuela enseña y esamina nun área despoblao, cerca del cuartel militar de Noreña. Y ello porque ye una zona d'espaciu aéreu non controláu que nun interfier nel movimientu de la ciudá. “Si daquién quier facelu volar nun llugar d'otres característiques tien de ser radiofonista pa poder comunicase cola torre de control en casu de que faiga falta”, cuenta. Y mesmo Ruiz que Seoane lo son.
Esisten delles categoríes de drones y llicencies de vuelu. Hasta la C6, estos vehículos estrémense según la masa, velocidá o altor máximu qu'algamen. Al respective de les habilitaciones, esiste l'abierta, de riesgu baxo; la específica, de riesgu medio, y la certificada, de riesgu alto.
El mayor peligru que supon volar ensin acreditación ye la intromisión nel campu aereu por desconocimientu. Nun son poques les noticies virales de problemes na redolada d'aeropuertos por cuenta de la presencia d'un dron y los vídeos qu'amuesen cómo un mozu inespertu pierde la pista al so dispositivu volador. “Por suerte, nun conocemos les consecuencies na so máxima rellumanza. El vuelu mínimu d'una aeronave ye de 150 metros, el máximu permitíu pa los drones ye de 120”, ilustra Castaño.
Aportáu a esti puntu, convién desaconseyar l'usu ensin llicencia, porque la multa puede xubir a una cuantía de 22.500 euros, asegura'l profesor. Y ye qu'anque abulten xuguetes nun lu son, nun siendo qu'ún adquiera la modalidá C0, que solo rique familiarizase col manual d'usuariu del fabricante. La meyora de les tecnoloxíes condergó al cielu al dominiu de los drones y ye que fai falta tener profesionales por que nun nos caigan enriba, al más puru estilu Astérix y Obélix.
