Rescatar el nome que teníen, na Edá Media, les cais del cascu históricu uvieín. Esa foi la propuesta que la medievalista María Álvarez, profesora titular del departamentu d'Historia de la Universidá d'Uviéu, llanzó'l pasáu miércoles, nun actu nel Club Prensa Asturiana de LA NUEVA ESPAÑA. Una idea que l'alcalde d'Uviéu, Alfredo Canteli, que participaba nel alderique, suscribió darréu. “Recoyer el nome de les cais nun ye un patrimoniu menor”, señaló naquella sesión la historiadora, qu'avanzaba qué implica'l rescate de la nomenclatura medieval d'eses cais del cascu históricu: ye la oportunidá d'acolumbrar la semeya d'aquella ciudá que conxugaba lo urbano y lo rural, lo relixoso y lo mercantil, y qu'empezaba'l so camín hasta convertise na ciudá que ye güei. 

Güérfana de reglamentos d'honores y distinciones y de Lleis de memoria histórica, el caleyeru de la ciudá yera una suerte de semeya sociolóxica que dexa entever el poderíu de los gremios profesionales y el pesu de la inmigración.

Tal qu'investigó María Álvarez, l'espaciu urbanu de la ciudá organizábase dende una concepción xerarquizao, primero en parroquies o feligresíes, que de la mesma taben estremaes en barrios, que s'articulaben en cais. Asina, los medievalistes identificaron siquier cuatro parroquies nel cascu antiguu en dómina medieval: San Tiso, San Xuan, Santa María de la Corte y San Isidoro. Tocantes a los barrios, de llendes más ensarañaes, conócense trés de grandes dimensiones: Socastiellu, el barriu del castiellu o fortaleza, que s'alcontraba al Noroeste de la ciudá; el barriu del Obispu, de los canónigos o de la viña, que se correspondería cola ciudá episcopal heredada d'Alfonso II; y el burgu mercantil, alredor de la plaza de San Isidoro, que na actualidá conozse como plaza del Paragües. Amás, tienense documentaos barrios más pequeños, casu del barriu del Carpio, na redolada de l'actual plaza del Sol. Y n'Uviéu, como singularidá, tienense documentao dellos campos, testimoniu d'esa convivencia de lo urbano y lo rural. Dalgunos entá perviven nel caleyeru, como'l Campu San Francisco, el Campu de los Patos o'l Campillín (entós Campu de los Ferreros). 

P'articular esti espaciu, según esplica María Álvarez, desenvolvióse un planu reticular, mui avezáu na dómina, articuláu a partir de trés exes axiales paralelos: el formáu pola confluencia de les actuales cais Cimadevilla y Rúa (denominada Cai Mayor en documentación caltenida de 1242) y “que coincidía cola entrada y salida del Camín de Santiago”, esplica Álvarez; el de Ferrería (actual cai Mon) y Gascona (qu'equivalía a l'actual cai de la Águila, una y bones l'actual Gascona yera “Gascona fuera” por tar extramuros); y el de Noceda (güei cai San Vicente). Estos trés grandes exes llonxitudinales yeren travesaos por otros trés tresversales, creando esi planu reticular: yeren Solazogue (San Antonio)-Canóniga; Platería (güei sumida) y Albergueros (cai Schultz). 

Los nomes d'eses cais, salta a la vista, atendíen en munches ocasiones al principal gremiu asitiáu na zona, y n'otres a la procedencia foriata de bona parte de los sos vecinos, como ye'l casu de Gascona. Una nomenclatura, d'últimes, qu'apurre una rica información pa esplicar la naturaleza y los oríxenes d'Uviéu. El so espíritu xenuinu.