En Veiga los cabezudos son muncho más qu'una mázcara. Son un símbolu de fiesta y son historia viva del pueblu, de los sos vecinos y les sos tradiciones. Y agora, amás, van ser un xuegu. 

Porque la comisión de fiestes Nuestra Señora de La Atalaya, organizadores del festexu de setiembre de “Las Telayas”, convirtió a los sos xigantes y cabezudos –los protagonistes dende va décades de la fecha festiva de la Víspera (el 7 de setiembre)– en 42.000 cromos ilustraos con adesivu que podrán mercase nel estancu del pueblu en sobres de 1 euru. Los cromos, poques gracies, tienen el so álbum –300 s'editaron– y l'oxetivu va ser qu'a fuerza d'abrir sobres vaigan cubriéndose les 70 caxellos qu'esperen pola so pegatina ilustrada. 

La idea ye que naide se dexe'l sueldu n'El Estanco, l'únicu del pueblu y por tantu'l que va tener la esclusiva d'una venta que va dir íntegra a la comisión. Asina que'l xuegu encamienta a socializar: va haber que cambiar cromos ente vecinos y llevar l'álbum a los vermús y les sobremeses pa dir completando caxellos.

Dellos de los cromos de la colección.

“Nun ye una colección de cromos pensada solo pal públicu infantil. Más bien el nuesu oxetivu ye la xente mayor, la que lleva más de 30 años viendo salir a los cabezudos el día de la fiesta y tienen munches alcordances venceyaes a estes figures”, esplica Gema Fernández Suárez, de la comisión de fiestes y una de les artífices de que'l proyectu viera la lluz. Ella coordinó la iniciativa, a la que-y punxo testos Raquel Baltar García. La maqueta y l'ilustración del álbum ye cosa de David Fernández Gorgojo, trabayador de LA NUEVA ESPAÑA, y de Diana Hernández García-Pertierra. 

Saben que nel pueblu hai espectación polo que se fixo, pero'l trabayu ye tan guapu que poques dudes-yos tendríen que quedar. “Dellos vecinos yá nos dixeron qu'un álbum completu va tener que se llevar al muséu, otru a la biblioteca... Oxalá-yos guste”, añede Gema Fernández. 

Quieren que guste porque la iniciativa va más allá d'una recaudación de fondos al usu. Lo que quixeron ye conseñar, de la meyor forma que se-yos ocurrió a unos parroquianos, l'amor poles sos fiestes. Que tienen la so singularidá nos personaxes amazcaraos. Por eso, amás de mazcaritos, nel álbum hai sorpreses y alcordances pa los qu'a lo llargo de tantos años caltuvieron la ilusión po la Víspera de Las Telayas y el compromisu cola so celebración.

Dos neños de Veiga colos cromos y l'álbum de los Cabezudos.

Dicen los promotores que “en Veiga esiste una gran tradición y amor polos cabezudos y el día del so desfile ye ún de los favoritos pa munches families”. Asina ye. De la entrevista con dalgunos de los cabezudos más veteranos surdió que l'álbum, a parte d'ilustraciones, incluya testos que recueyen parte d'esa historia. Asina, nel llibretu cúntase que naide sabe pone-y la fecha esacta a la llegada al pueblu de los cabezudos. “Los nuesos güelos empezaron a coleccionar esos momentos a principios de sieglu, anque entós nun había Víspera, sinón que salíen el día d'Asturies pela tarde, y nun yeren 80 como agora, sinón cinco; pero la maxa empezó yá a entamangase na Rula y la lleenda foi creciendo”, espliquen. 

Pa mediaos del sieglu pasáu, el Borracho, el Cocinero, Geppetto, el Payaso y la Bruxa yeren los únicos cabezudos del pueblu y yá empezaron a salir en desfile la Víspera. La identidá de los vecinos que s'escondíen tres los mazcaritos yera un misteriu y esi ocultismu yera parte del xuegu. Nun foi hasta finales de los ochenta cuando un vecín, Tameyo, sumó Los Xigantes a la fiesta. Estelaron y dieron mieu, pol so tamañu, a partes iguales, pero tamién llegaron pa quedase. Pasó'l tiempu y cúntase qu'en dalgún momentu hubo más de cien cabezudos saliendo peles cais de Veiga, dellos de la Comisión de Fiestes y otros de comisiones vecines.

Dos neños pegando cromos nel álbum.

Cola fin de sieglu, en Veiga yá hai delles xeneraciones de vecinos que crecieron corriendo al llau d'estos singulares protagonistes de la fiesta, recatiando los sos palos y escoyendo cuál ye'l so favoritu. Y tou eso cúntase nesta iniciativa ilustrada. 

La comisión de fiestes va aprovechar los festexos del Corpus, que ye la primer espicha de la temporada, pa facer un llanzamientu especial: esti día, el 18 de xunu a les siete de la tarde, va empezar la venta del álbum y siete sobres de cromos al preciu de 10 euros. A partir d'esi día, y hasta fin d'esistencies, va comercializáse nel establecimientu El Estanco, emblemáticu de Veiga, a 5 euros l'álbum y un euru por sobre. “Oxalá que-yos guste, porque ta fechu con tol ciñu”, insiste Gema Fernández. 

Nun ye difícil imaxinar qu'en Veiga l'álbum de cromos de los Cabezudos va ser meyor que l'álbum de la Lliga.