L'artista asturianu Rodrigo Cuevas ye ún de los premios «Arcoíris» d'esti añu que concede la dirección xeneral de Diversidá Sexual y Derechos LGTBI, dependiente del Ministeriu d'Igualdá. Prémienlu pola so «visibilización de la diversidá sexual y de la llibre espresión de xéneru recuperando espacios tradicionales como'l de la música folk». 

Y eso significa que'l llunes 27 de xunu, víespora del Día Internacional del Arguyu LGTBI, na Residencia d'Estudiantes de Madrid Rodrigo Cuevas va compartir aplausos con Pedro Almodóvar, Paco Tomás –presentador de Wisteria Lane–, col guionista Abril Zamora, coles humoristes Carolina Iglesias, Irantzu Varela y Nerea Pérez de les Heras; cola abogada Charo Alises; l'artista Samantha Hudson; la pareya de refuxaes árabes Amal y Ebitsan, y el director xeneral de Discapacidá, Jesús Martín Blanco.

Rodrigo Cuevas taba esti día nel Festival Ríu Llocu, en Toulouse (Francia), atendiendo como podía les felicitaciones por un galardón que se va sumando a los que, a cada pocu, y-van llegando. Y toos los celebra tresmitiendo una allegría inmenso. «¡Qué guay!; toi encantáu. Faeme muncha ilusión», dicía'l señaláu. Cuevas caltien que les bones noticies del colectivu entá hai que celebrales con ganes porque «siempre hai que recordar d'ónde venimos. Parez que la hestoria nuesa, la del colectivu LGTBI, la de les muyeres, foi siempre asina, una hestoria vivida con allegría. Y nin tanto. Como siempre diz un amigu míu, parez que llevamos tola vida debaxo d'una bola de discoteca y nin tanto. Esto ye de va 20 años p'acá; enantes veníemos d'una hestoria de mierda. Y con too y con ello, entá hai permuncho de LGTBIfobia y machismu per delantre, que por cierto son el mesmu tipu de violencia», sostien l'artista. 

Con esti premiu nacional, y cuasi con cada galardón, Cuevas alcuérdase de «Rambalín; de Samuel el chavalín gallegu que mataron l'añu pasáu; de tola xente que se casó ensin querer casase y ensin amar a la so pareya... de toles muyeres que quixeren marchar de casa y nun pueden, nin les dexen, llevantar la voz». Quédase curtiu. «Hai tanta xente pola qu'inda tenemos que reivindicar...». 

La entrega de les que son les segundes reconocencies Arcoíris a persones destacaes na visibilización, sofitu y defensa de los derechos de les persones LGTBI va contar cola presencia de la ministra Irene Montero y énte tolos presentes, Rodrigo Cuevas va tener oportunidá de facer un show. Porque ye «un referente LGTBI nel mundu de la música», dicen los organizadores.