Berta Piñán, conseyera de Cultura, Política Llingüística y Turismu, y Graciela Blanco, Viceconseyera de Turismu, presentaron el proyectu d'una nueva plataforma que va sirvir de sistema intelixente de monitorización turística d'Asturies y va suponer, según palabres de Piñán, "un pasu fundamental na tresformación del modelu turísticu rexonal". Ye un portal virtual nel que, mesmo visitantes qu'empresarios o investigadores, van poder atopar información contrastada sobre la ocupación y los movimientos de los visitantes nel territoriu asturianu. 

La plataforma, que s'entamangó con una inversión de 600.000 euros, supon “un esfuerzu por que la marca Asturies gane competitividá, yá que se dispon d'información calidable y constrastada. El gobiernu d'Asturies asumió'l retu de reformar el turismu y, con esta iniciativa, ábrese un escenariu nuevu d'esplotación de los paraxes turísticos d'Asturies”, afirmó Piñán. Trai consigo una llinia de sostenibilidá, que reflexa “un exerciciu de tresparencia”, col enfotu de facer tolos datos útiles, según aporfió la conseyera.

L'oxetivu ye incorporar nueves ferramientes que, cola ayuda del big data, amuesen cómo se mueven los visitantes y qué sitios frecuenten. Otru llogru que pretende consiguise con esta plataforma ye formar una rede d'ecu-contadores, que va dexar almacenar información sobre l'actividá turística de munches zones, incluyíes aquelles de les que solamente se teníen datos aproximaos y pa nada precisos. La Sienda del Osu, por casu, va ser una de les zones beneficiaes nesti sentíu.  

La páxina va apurrir un siguimientu de l'actividá turística, y va ser “mui intuitiva y bona d'usar”, aclaró Graciela Blanco, axuntando que “tamos dando un pasu importante, con un proyectu útil y qu'apurre bona información al turista”. 

Nel actu de presentación tuvo'l presidente de la patronal turística d'Asturies, Otea. "L'observatoriu turísticu ye una demanda que llevamos diez años pidiendo a los distintos gobiernos. Agora'l Principáu presentó una iniciativa que ye prácticamente lo mesmo, anque tenga otru nome. Ye una satisfaición porque por una vegada tamos pensando en coses pal futuru y ye bien bona noticia", opinó José Luis Álvarez Almeida, que cree que la nueva plataforma "tien que venir sofitada polos conceyos d'Uviéu, Xixón y Avilés porque sería bono qu'hubiera cierta coordinación", al cuntar dalgunu de los consistorios coles sos propies ferramientes de monitorización. Almeida agradez el sofitu de Ciudadanos a una propuesta que yá tresmitiera Otea a tolos partíos.