La restauración del quioscu del Bombé avanza, por fin, a bon ritmu. La emblemática estructura del Campu San Francisco vese yá, depués de siete años, llibre d'andamios, y recuperó la so cubierta. Anque se dieron pasos cruciales, inda falten delles selmanes para completar la restauración del quioscu, un auténticu iconu del Campu alredor del que baillaron uvieínos de trés centuries distintes.
El quioscu del Bombé foi una iniciativa del Conceyu dirixida a acoyer los conciertos de la Banda de Música municipal. La construcción aprobóse en septiembre de 1887, sobre un bocetu del entós arquiteutu municipal, l'uvieín Juan Miguel de la Guardia. Siguiendo les claves d'esta tipoloxía, en puxanza a lo llargo del sieglu XIX y los primeros años del XX, el templete componse d'un basamentu (destináu a almacén y que podía allugar aseos), un escenariu abiertu y, encontada en columnes, una cubierta.
Tal que señala Clara Rei-Stolle, l'arquiteutu responsable del plan de restauración, el diseñu incorporaba amás los materiales habituales nesti tipu de construcciones: piedra y lladriyu pal basamentu, fierro fundíu pa les columnes, y cinc y madera pa la cubierta. "La fundición va usase amás nes barandielles y celosíes llaterales de zarramientu, siendo'l fierro forxáu l'emplegáu nes vigues de sofitu de cubierta y l'armadura d'ésta", escribe Rei-Stolle en "Proyecto de Restauración del Quiosco de la Música del Paseo del Bombé en el Parque de San Francisco de Oviedo", artículu publicáu na revista académica "Liño" nel qu'analiza'l so proyectu.
Sobre estes premises, Juan Miguel de la Guardia desenvolvió un novedosu diseñu que tendría cierta repercusión, al cubrir el quioscu con una cubierta en forma de bóveda d'ocho paños. L'ésitu de la solución llevaría al arquiteutu a repitir la fórmula n'otros llugares, como ye'l casu de Noreña, que'l so quioscu, inauguráu en 1892 y qu'entá se caltien n'usu (remocicóse va pocos años) ye una replica casi esacta, pero a un tamañu daqué menor, del Bombé.
Según documenta Rei-Stolle, la construcción del quioscu uvieín foi aprobada pol Conceyu'l 3 de setiembre de 1887, y la obra axudicóse'l 2 de marzu del añu siguiente a Doroteo Manterola, al tiempu que la estructura y los elementos de fundición fueron realizaos pola fundición d'Arturo Bertrand, que de fechu volverá facese cargu del diseñu de Juan Miguel de la Guardia pal quioscu de Noreña.
Los trabayos de construcción del quioscu avanzaron con gran rapidez. Tanta, que pa les fiestes de San Mateo la estructura yá taba llista. Asina lo conseña una nota publicada nel extintu diariu "El Carbayón", el 20 de setiembre de 1888: "Completamente terminado el kiosco construido en el Bombé y libre ya de los andamios, luce en toda su esbeltez la hermosa corrección de sus líneas.
Todo el mundo admira esta nueva obra del arquitecto municipal. Sr. Laguardia, que cada día adquiere mayor reputación en toda la provincia. Indudablemente el kiosco del Bombé es uno de los más bonitos de España, pudiendo asegurar que de los que nosotros hemos visto ninguno aventaja al nuestro".
El d'aquel añu foi un San Mateo lluviosu, qu'esllució o directamente obligó a suspender delles actividaes, incluyíu un gran baille previstu pal 21 de setiembre, vienres, nel Campu, anque ye probable que'l quioscu estrenara un par de díes dempués, como s'albidra nuna crónica de les fiestes publicada coles mesmes en "El Carbayón" el 25 de setiembre de 1888: "La lluvia impidió que se verificara el gran paseo en el Bombé, el jueves por la tarde, y además destrozó la mitad de los faroles, ya colocados en aquel ameno sitio, que con el resto formarían la mejor de las iluminaciones vistas en Oviedo (...)
Tampoco pudimos ver los fuegos palentinos, ni el baile campestre, el viernes por la noche, gracias a los abundantes chaparrones que cayeron casi a la hora crítica de dar comienzo estos espectáculos. Una fuerte tronada impidió, el domingo, los festejos de la tarde; y por la noche disparánronse en el Bombé profusión de cohetes y tocó la banda militar escogidas piezas". Foi, probablemente, el primeru d'una infinidá de bailles que, nestos más de 130 años, completaron uvieínos y foranos alredor del icónicu templete de Juan Miguel de la Guardia.
