La Formación Profesional tien puxu. Y tien tantu puxu que les solicitúes d'almisión pal próximu cursu, el 2022-2023, incrementáronse nos graos medios y, especialmente, nos superiores, onde la demanda supera de llargo a la ufierta. 

No referente a los graos medios, y según los datos qu'apurre la Conseyería d'Educación, rexistráronse 3.940 pidimientos pa un total de 4.479 places. Pero ye nos graos cimeros onde s'aprecia meyor el puxu d'esti tipu de formación, con 5.004 pidimientos recibíos pa un total de 4.623 puestos. 

Según remarca la Conseyería d'Educación, la demanda ye especialmente alta nos ciclos de les families profesionales de Sanidá y d'Informática y Comunicaciones. Na rama sanitaria, esta demanda caltiense alta magar la dificultá añedida de que nun esistan places abondes pa realizar la formación en centros de trabayu. Esto nun quita pa que la demanda supere a la ufierta en delles enseñances, magar se tengan incorporao nueves enseñances d'esti ámbitu como les de Cuidaos Auxiliares d'Enfermería o Farmacia y Parafarmacia, dambes de grau mediu, o Hixene Bucodental, en grau cimeru. 

Na familia d'Informática y Comunicaciones la demanda ye coles mesmes superior a la ufierta, magar qu'Educación incrementó places nestos estudios nos últimos cursos. La conseyería avanza que yá trabaya n'ampliar la ufierta de dambes families profesionales, Sanidá per un llau ya Informática y Comunicaciones per otru, con cuenta de cubrir tola demanda. 

Nel otru llau de la balanza asitien los ciclos de grau mediu del ámbitu industrial, que la so demanda Educación califica como "mui baxa", magar que'l Principáu cunta con una ufierta completa en tou esti campu, integrando ciclos como Alministración y Xestión, Instalaciones Eléctriques y Automátiques o Mecanizáu y Caltenimientu Electromecánicu.

Ampliación

La medría de les matriculaciones en FP produzse dempués de que'l Gobiernu autonómicu incrementara d'un xeitu decidíu la ufierta de titulaciones cara al próximu cursu. En total, la Conseyería d'Educación incorporó 11 ciclos formativos a la cartera de titulaciones, dos de nueva implantación y otros nueve qu'amplíen la ufierta de los yá esistentes. Amás, ufiértense cinco nuevos cursos d'especialización. Un incrementu de la ufierta que permitió a Educación ampliar el númberu de places pal nuevu alumnáu, que pasa de 8.882 a 9.582 sumando los 94 ciclos qu'integren el catálogu de la FP n'Asturies. 

Los cursos de nueva implantación son Paisaxismu y Medio Rural, que se va impartir nel IES Lluces de Colunga, y Estilismu y Dirección de Peluquería, que s'incorpora a la ufierta educativa del IES Pérez de Ayala d'Uviéu.