Asturies empezó a ser esti día la gran protagonista de la edición d'esti añu del festival intercélticu de Lorient. El númberu 51 del referente européu de la cultura celta, que cada añu axunta alredor de 800.000 asistentes. La gran mayoría de los 25 grupos y artistes que van treslladar ellí'l talentu de la rexón a lo llargo d'unos díes –en total más de 200 persones– yá taben en tierres bretones –o en ruta– pal momentu de llevantase'l telón na tarde del vienres pasáu, anque la inauguración oficial foi'l sábadu.
A lo llargo de los diez díes que dura'l certame –hasta'l próximu 14 d'agostu– Asturies va cuntar col so propiu pabellón, nel qu'esti día hubo presencia oficial col director xeneral de Cultura, Pablo León. Va ser el centru neurálxicu dende'l que se va ufiertar una amplia programación. "Queremos que'l pabellón tea siempre activu, con muncha música asturiana, y que tamién sirva como reclamu turísticu y que los asistentes al festival disfruten de la sidra y conozan la nuesa llingua", afirmó'l gaiteru Iñaki Santianes, que ta al mandu de la delegación asturiana: "Esta edición garrámosla con muncha ilusión, tenemos ganes d'amosar la riqueza cultural de la rexón y facer una bona representación d'Asturies". Sobre manera al ser esta la primera en quince años que nun va tener al frente al asturianu Lisardo Lombardía. "El legáu que dexó ye enorme, foi l'impulsor de la implantación de la cultura céltica n'Asturies y de la vinculación d'Asturies con tol arcu atlánticu", afirma Santianes.
Tamién la gastronomía y la sidra tuvieron mui presentes casi dende l'entamu, igual que toa una gran cantidá d'iconografía que paecía dispuesta a invadir el país vecín. Y el presidente Adrián Barbón yá anunció la so visita pal martes.
Cinco grandes cites, incluyíu l'homenaxe a Elías García
Puestos yá en manera artística, el pistoletazu de salida diólu'l grupu "L-R", dispuestu a ufiertar en Lorient la so música fusión de ritmos tradicionales asturianos col rock y el blues.
Amás de tola actividá desenvuelta dende'l pabellón asturianu, a lo llargo de los diez díes que dura'l festival intercélticu de Lorient hai importantes cites pa tolos qu'alleguen. Estos son dalgunos de los eventos imprescindibles nos que la presencia d'Asturies ye bien destacada y nos que tamién se busca la integración y fusión de les distintes cultures celtes. La música asturiana Mapi Quintana ufiertó'l conciertu d'apertura llamáu "Música pa tornar páxaros", que rinde homenaxe al artista Elías García, fináu en 2019. El show va entemecer repertoriu inéditu compuestu pa la ocasión con una reinterpretación de cantares tradicionales del conceyu de L.lena. El tributu al músicu asturianu va siguir col grupu qu'él mesmu fundó, "Llan de Cubel", que tamién forma parte del cartel del festival. La banda de folk asturianu va actuar xunto al gaiteru Hevia na denominada "Gran nueche d'Asturies", que va celebrase'l 11 d'agostu. Xunto a ellos tamién van participar nesa gran nueche la cantante Silvia Quesada y el gaiteru José Manuel Tejedor, col espectáculu "Celtic Odysesée", en collaboración con un ampliu númberu de músicos d'otres rexones celtes. Esti día tamién se celebró l'espectáculu "Horizontes Célticos", nel que participen el grupu de baille Trebeyu y la banda de gaites Llacin pa ufiertar una exhibición de lluces y soníos que va cuntar con representantes de tolos países del arcu atlánticu. Otru finxu de la programación del festival aporta cola llamada "Grande parade", que consiste nun desfile de les naciones celtes. Casi cien grupos van percorrer les cais de Lorient coles mires d'amosar la so propia cultura y la enriquecedora variedá qu'esiste ente'l mundu celta. Iñaki Santianes va tener tamién una participación destacada nesta 51º edición, una y bones el próximu día 10 va formar parte de la "Grande Soirée de la Cornemuse", que supon un espectáculu íntegru de gaites, nel qu'amás de l'asturiana va haber gaita bretona y escocesa.
