El Conceyu d'Uviéu encargó la redacción d'un proyectu pa entamar les meyores de la torre, el palaciu y la capiella incluyíes dientro del denomináu conxuntu hestóricu de Lluniego. Esti ye'l primer pasu pa dar lluz verde a les reformes na zona. Sicasí, al tratase d'un espaciu declaráu Bien d'Interés Cultural (BIC), cualquier obra entamada nesti enclave tien de tener l'aprobación espresa de la Conseyería de Cultura.
El plan pal conxuntu de Lluniego ye un proyectu que tenía en pensamientu, dende la so llegada al Ayuntamientu, la conceyalía d'Infraestructures que lidera Nacho Cuesta. Nos presupuestos pa esti añu acutáronse dos partíes: una pa rehabilitar la ponte y otra, a la que se da forma nesti contratu, la recuperación del palaciu. L'oxetivu ye, fundamentalmente, remocicar y ayudar al caltenimientu del conxuntu históricu d'orixe medieval que s'atopa xunto al ríu Nalón. Dar solución al deterioru de la zona yera daqué que se venía intentando delles llexislatures pero qu'hasta agora nunca se llegara a materializar. Declaráu BIC nel añu 1991, el conxuntu ta formáu pola ponte del ríu Nalón, dos capielles, la Torre de Muñiz y el Palaciu de los Quirós.
L'oxetivu del contratu, por tanto, ye disponer d'una empresa que entamangue l'asistencia técnica que determine les obres que sería conveniente entamar nesti espaciu y la viabilidá de la restauración. En resume, el documentu que s'ellabore tien de xustificar, definir y valorar la necesidá de les reformes de la torre, palaciu y capiella del conxuntu históricu de Lluniego.
Los vecinos de la zona reclamaron a lo llargo de décades que s'igüe l'abandonu del conxuntu, que tien muncha historia detrás. Los primeros rexistros d'esti enclave daten del sieglu XII, cuando la ponte yá sirvía como ruta d'intercambiu comercial ente Lleón y Uviéu. Tres la ponte vieno la construcción de la capiella románica de San Pelayo, y ente los sieglos XIII y XVI llevantaron la torre y el palaciu.
D'ehí'l gran valor singular qu'alluga esti conxuntu, una y bones esti complexu d'edificaciones d'orixe medieval cuenta con una obra relixosa, una obra civil y una obra d'inxeniería. Pero la esviación del ríu dexó güérfana a la ponte y de resultes el conxuntu históricu cayó nel abandonu. Daqué a lo qu'agora se -y quier poner por fin remediu.
El contratu aprobáu por Infraestructures tien una duración máxima de seis meses, y va sirvir de base p'analizar les actuaciones a entamar. El proyectu que s'ellabore tien de describir les midíes necesaries p'asegurar la estabilidá de fábriques y cubiertes. Tamién definir y concretar les meyores que se deben realizar nel interior del recintu y na redolada más cercana coles mires de garantizar la correcta conservación y caltenimientu del conxuntu.
El contratu p'analizar toles meyores que quieren entamase nel conxuntu axudicóse a Valentín Arrieta Berdasco, que presentó la meyor ufierta al Conceyu con un presupuestu de 17.908 euros. La necesidá de facer una contratación esterna débese a que los medios personales y materiales del Serviciu d'Infraestructures son insuficientes pa executar un proyectu d'esti altor.
La otra partida presupuestaria ye la que busca rehabilitar la ponte medieval. Va unos meses, el grupu Arqueos de la Universidá d'Uviéu afayó que la ponte medieval tien trés metros más d'altor escondíos sol suelu. El proyectu de rehabilitación sumó entós esa necesidá al proyectu que l¡área empobinada por Nacho Cuesta yá tenía en mente: desenterrar les vigues pa devolve-y la so imaxe orixinal.
