La inflación y l'aumentu de les contrataciones lleven –acordies con los últimos datos publicaos pola Axencia Tributaria– la recaudación fiscal n'Asturies a máximos dende l'añu 2008. Facienda fixo una caxa de 1.194 millones d'euros a lo llargo del primer semestre del añu, un 17,4% más que nel mesmu periodu del pasáu exerciciu. A pesar del alza na recaudación fiscal n'Asturies, la medría ta inda perriba nel conxuntu d'España, onde Facienda vio cómo aumentaben los sos ingresos un 18,3% la primer metá del añu (107.008 millones d'euros frente a 90.475). 

Les dos principales partíes, l'Impuestu sobre la Renta de les Persones Físiques (IRPF) y l'Impuestu sobre'l Valor Añedíu (IVA) disparáronse n'Asturies percima de la media nacional, que se compensa pola escasa penetración na rexón de la recaudación por otros tributos como l'Impuestu de Sociedaes, los Impuestos Especiales, sobre Tráficu Esterior o sobre la Renta de Non Residentes.

La medría más llamativa de los datos sobre Asturies dase nel IVA, fuertemente amestáu al consumu y a la evolución de los precios y qu'asitia como'l tributu que más contribuyó a les arques públiques na rexón. La recaudación disparóse n'Asturies un 47,3% a lo llargo de los primeros seis meses del añu, una variación que dobla la esguilada d'esta partida a nivel nacional, que foi d'un 20,6%. Nel Principáu, el fiscu ingresó gracies al IVA hasta 646 millones nel primer semestre, la cifra más alta de la serie histórica, qu'empieza en 2007. 

Por grupos d'impuestos, l'IRPF ye'l segundu tributu con mayor pesu n'Asturies con una recaudación de 491 millones d'euros. Esti impuestu esperimentó na rexón un aumentu del 16,4% al respeutive de los 422 millones rexistraos nel mesmu periodu del añu pasáu. 

A escala estatal, l'Axencia Tributaria esplica que l'impuestu sobre la renta ye “la figura que sigue amosando un comportamientu más dinámicu pol aumentu de la masa salarial y de pensiones y pola consecuente medría del tipu efectivu”. Una aseveración en clave nacional que nun concasa la realidá asturiana, onde l'IVA sigue siendo'l protagonista. Sicasí, la tasa de variación de la recaudación del IRPF foi mayor n'Asturies que na media española, onde evolucionó un 15,2%. Les actualizaciones de los salarios y la cayida del desempléu favorecieron una mayor recaudación, tamién, nesta partida. 

Onde s'esbarrumba la recaudación n'Asturies ye nel Impuestu de Sociedaes, onde Facienda tuvo que devolver a les empreses más de 10 millones d'euros nos primeres seis meses del añu.