La devolución de dos cuadros prindaos pol réxime franquista al empresariu vascu Ramón de la Sota y Llano en 1937 a los sos herederos, formalizada va unes selmanes pol Ministeriu d'Industria, Comerciu y Turismu, sienta un precedente y abre la puerta a nueves reclamaciones. Les obres espoliaes siguieron dellos caminos. Les de Ramón de la Sota acabaron na Colección Artística de Paradores, otres anden repartíes per museos de tou'l país. Nel de Belles Artes d'Asturies hai un depósitu de 107 obres, delles espuestes nes sos sales, procedentes de les prindes franquistes.
Hasta agora naide reclamó nenguna d'eses obres al Belles Artes y nel casu de qu'eso pasara, visto que les obres tán en depósitu, sería'l Ministeriu de Cultura'l que tendría que resolvelo. Paula Lafuente, técnica responsable del rexistru, esplica qu'en 1941 llegaron a la esaniciada Diputación Provincial 119 obres procedentes del espoliu. Nin siquier se madaron correchamente, porque veníen a nome del "muséu provincial de pintura", una institución qu'enxamás esistió.
En 1980, cola creación del Belles Artes, eses obres pasaron al Muséu y va unos años la institución entamó un minuciosu trabayu d'identificación. "Nes traseres, a les obres, cuando te prindaben un cuadru, poníen una pegatina y dábente un acta", esplica Lafuente, y con eses pegatinas, la documentación de l'antigua Diputación, del Institutu de Patrimoniu Cultural y de diversos archivos identificó 107 d'eses obres. Otres 12 fueron imposibles d'alcontrar hasta agora.
Eses 107 obres tán documentadas y pueden consultase na web de la Universidá Complutense, tres l'estudiu que sobre les obres d'arte prindaes pol anterior réxime realizó'l catedráticu Arturo Colorado. El Belles Artes, según Lafuente, atendió "consultes académiques", sobre la colección de Pedro Rico, l'alcalde de Madrid, de la qu'hai trés obres nel Belles Artes, por exemplu. Parte de les obres d'esi depósitu ta espuesta nes sos sales: "Virxe de l'Anunciación", de Juan Correa; "Vendedor de periódicos", de Jiménez Aranda; "El bodegón de pescaos", d'Elias Vonck; "Nuestra Señora de la Bona Guía", de Genaro Lahuerta; "María Luisa Díez-Canedo", de Cristóbal Ruiz, y "Fernando VII y María Cristina", de Luis de la Cruz y Ríos. Va unos años el Muséu asturianu dedicó un ciclu de visites a estos fondos, que llevantaron gran interés y resultaron bien animaes.
