Una trentena de neños recibe'l so bautizu astronómicu en Piarnu

Una de les necesidaes de los rapazos con altes capacidaes, o lo que ye lo mesmo, sobredotados intelectualmente, ye recibir estímulos que-yos dean un arriquecimientu curricular, y si ye posible facelo en clases especiales nes que puedan tar con compañeros como ellos. Y eso foi lo que-yos dio l'astrónomu aficionáu Ramón Hevia esta fin de selmana a una trentena d'alumnos a los que tuvo ocasión apocayá d'impartir clases teóriques d'astronomía. Ye cosa de pasar de la teoría a la práctica, y pa eso abrió al grupu les puertes del observatoriu espacial que mangó en Piarnu (Castrillón), una ventana al universu que tien ente'l so instrumental un súper telescopiu. 

"Espliqué-yos nociones básiques del manexu del telescopiu y falamos de qué se puede ver cola so ayuda. Como'l día nun yera mui aparente meteorolóxicamente pa grandes observaciones, tuvimos mirando'l Sol con un aumentu visual equivalente a tar 70 vegaes más cerca de lo que tábemos en realidá, lo que permite apreciar nídio, por casu, les manches solares", comentó'l monitor astronómicu. 

Hevia tamién empobinó a los alumnos nes materies nes que trabaya nel observatoriu en collaboración cola Universidá d'Uviéu: busca d'exoplanetes, minería d'asteroides... Y los neófitos na materia enseñaron interés por asuntos como la basura espacial o les estrelles. 

Ramón Hevia quier pensar que, daes les altes capacidaes de los convidaos tan especiales que tuvo en Piarnu, en dalgún d'ellos grane l'interés pol espaciu y afonde na materia, quién sabe si quiciabes llegando a convertise nel futuru nun investigador de l'Axencia Espacial Europea. A lo menos, la xornada foi provechosa p'ampliar conocencies cósmiques.