El meyor Picasso en formatu grabáu puede vese yá nel Muséu de Belles Artes

"Tu yes namás un país superpobláu". La definición en forma de versu que Rafael Alberti fixo del so amigu Pablo Picasso sirve al Muséu de Belles Artes d'Asturies pa dar sentíu y títulu a una esposición que s'inauguró'l 1 de xunu. Nuna amuesa na que'l públicu, asturianu y foriatu que s'avere al muséu, va poder somorguiase na fecunda y trescendente producción de Pablo Picasso como grabador, una disciplina artística na que'l malagueñu dexó una buelga fonda, hasta'l puntu de convertise nún de los grandes de la hestoria del arte .

"Un país superpobláu. Estampes de Picasso" favorez una ocasión única pa ser a somorguiase nel conxuntu de la producción picassiana nesta disciplina artística. La esposición, instalada nes sales 10 y 11 de la Casa d'Uviéu-Portal, ta compuesta por 22 estampes del xeniu malagueñu, y con una adicional de Juan Gris como complementu. Los grabaos vienen de trés colecciones particulares y de los mesmos fondos de la gran pinacoteca asturiana, qu'apurre les dos estampes que tien de Picasso: son dos obres ensin títulu que representen respectivamente a un mosqueteru con una odalisca-aguamala y una composición con Hércules, dambos fechaos en 1970.

Lo que más rescampla de l'amuesa ye que la selección d'obres que la comisaria, Laura Baños (Ayudante Conservador d'Artes Industriales y Artes Gráfiques del Belles Artes) definió, permiten trazar un percorríu pel conxuntu de la trayectoria como grabador de Picasso y les sos distintes etapes creatives, nun arcu temporal que toma dende la década de 1910 hasta los últimos años de vida del pintor, que finó en 1973, fai agora medio sieglu.

UDe los sos entamos nesta disciplina artística pueden vese na amuesa obres como l'aguafuerte "L'home del sombreru". Una estampa realizada por Picasso en 1914 (anque la obra que llega a l'amuesa ye d'una edición posterior, de 1947) ya incluyida originalmente na carpeta "Du Cubisme".

Picasso produció esti grabáu nun momentu crucial de la so trayectoria, nuna etapa de gran esperimentación que nos años siguientes, col españíu de la Gran Guerra y la muerte, en 1915, de la so compañera y musa na dómina, Eva Gouel, va resentise.

Otra obra significativa que puede vese ye "Escultor y grupu escultóricu de trés baillarines", un aguafuerte incluyíu na "Suite Vollard, 2", fecháu'l 2 de marzu de 1934. Esti conxuntu ye una de les creaciones fundamentales del Picasso grabador y, a xuiciu de munchos especialistes, la serie de grabaos más importantes del so tiempu. Son un total de 100 obres, feches toes elles ente 1930 y 1937 (pero especialmente a partir de 1933), y encargaes pol marchante Ambroise Vollard. 

De los últimos años de la so producción, amás de les dos estampes que formen parte de la colección propia del Belles Artes, pueden contemplase nesta amuesa obres como una llámina de la "Suite 156", de nuevu un aguafuerte fecháu ente'l 5 y el 6 de mayu de 1971. Esta serie ye la que cierra la obra gráfica de Picasso y tamién supunxo la última esposición realizada en vida pol malagueñu . Trátase d'un conxuntu de 156 estampes realizaes ente 1968 y 1972, anque les más de les obres concéntrense ente xineru de 1970 y marzu de 1972. 

La estampa de Gris que complementa l'amuesa, y que llega al muséu dientro del programa "La obra convidada", ye coles mesmes notable: una adaptación de la célebre semeya cubista de Picasso pintada por Gris en 1912 (y que güei se guarda nel Institutu d'Arte de Chicago) que s'incluyó originalmente na citada carpeta "Du Cubisme" y que, como l'otru grabáu, vien d'una edición de 1947.