Aarón Zapico estrena "De Sópitu", "el proyectu más personal de la mio vida artística"

El director d'orquesta y clavecinista asturianu Aarón Zapico, tien una cita'l 9 y el 10 d'agostu en Cantabria col Festival Internacional de Santander pa estrenar la obra "De Sópitu", xunto a la so formación Forma Antiqva. Trátase, esplica, d'una propuesta qu'ufierta "una nueva interpretación y contestu pa la música de raigañu popular del norte d'España". Una propuesta que siquier n'apariencia saca de "puntu" a una formación que s'estremó pola excelencia na so interpretación de la música del barrocu. 

Con una producción del propiu festival pero con idea orixinal, selección ya igües d'Aarón Zapico, lo que va ufiertar la formación va ser "un repertoriu compuestu por cantares, fandangos, saltones, xiringoses, xiraldilles y blincos d'Asturies, Cantabria, Galicia, Inglaterra ya Irlanda". 

La singularidá del proyectu merez que sía Aarón Zapico el que la esplique, coles sos palabres. "Ye ún de los proyectos más interesantes, importantes y personales de la mio vida artística. Nun ye un encargu, nin nos facía falta, nin pensamos nél d'una forma grandilocuente", diz. "De Sópitu" alzóse, recalca'l músicu, "como una necesidá personal. Tuvi la necesidá de facer daqué que conectara cola música de la mio tierra, el folclore, con tolo que sabía, albidraba y lo que tenía na cabeza. Eses músiques que me resultaben conocíes, como si fuera un terrén mui transitáu, pero que nun fueron la mio especialidá". Esplica que fai más de cinco años que "empecé a lleer, investigar y a preguntar a una montonera xente, y a establecer conexones" que lu llevaron a ver que "d'esa música popular sale too; asina foi en toles dómines de la hestoria de la música, pero entá ye más nel barrocu, nos sieglos XVII y XVIII". 

Asina nació "De sópitu", un proyectu col que "la música popular pasa a un primer planu d'una manera improvisada y con un puntu de descaru. La idea ye amosar con tola so rellumanza esi raigañu popular y tocar toa esa música que creemos que nos pertenez, que ye la d'Asturies, la de Galicia, la de Cantabria, la d'Escocia, la d'Irlanda... la de tou l'Arcu Atlánticu", encadena Aarón Zapico. 

Pa los que se faigan cábales equivocaes, Zapico remarca que "la idea nun ye convertir Forma Antiqva nun grupu folk, un espaciu que yá tienen otros, sinón amosar esi llau mas folclóricu de la música barroca y ver qué conexones tien cola música qu'entá anguaño se ta interpretando". 

A lo llargo del conciertu siete solistes de Forma Antiqva van entemecer los instrumentos históricos col folclore, la tradición oral cola académica y empobinaos por una alta dosis de creatividá van aportar a una conxunción esplosiva. "Los instrumentos que vamos utilizar son los mesmos que toquemos siempre: guitarra barroca, tiorba, violonchelu barrocu, un órganu positivu, instrumentos de vientu ... los mesmos que si fixéramos sontates barroques de Vivaldi o de Händel. Pero vamos restolar, vamos esaniciar etiquetes y abrir compuertes". 

Porque dacuando, lo obvio nun lo ye tanto. "Georg Friedrich Händel en ‘El Mesíes’ escribió una sinfonía pastoral que suena a gaites y zanfoñes; y en llibros refinadísimos de sonates aprucen gaites, zanfoñes, flautes y música pastoral, música del pueblu", argumenta Zapico, d'ende que quixera "ver qué pasa con esa música del folclore si la interpretamos como si fuerámos músicos del sieglu XVIII". 

Sabe que la ufierta va ser "un totum revolutun, pero ye la música de los nuesos raigaños, bien reconocible. Vamos dir saltando d'Inglaterra a Asturies, d'Escocia a Irlanda, a Galicia ... Vamos tocar una xota popular de Caldueñu y un romance cántabru que yo punxi música a les sos estrofes, por poner dos exemplos. Va ser una mecigaya de golores, colores, sabores, ritmos y melodíes qu'a mi m'abulta perinteresante anque nun sía nada habitual nel nuesu repertoriu". 

Puestos a comparar, diz Aarón Zapico que "De sópitu" ye como "Sancta ovetensis" –una xoya musical del sieglu XVIII rescatada por Forma Antiqva de los archivos de la Catedral d'Uviéu– pero más de la cai". Los conciertos van tener llugar na ilesia de la Virgen Grande de Torrelavega el xueves 9 y na ilesia de San Pedro de Noja el vienres 10. 

Per otru llau, Aarón Zapico y Forma Antiqva tamién van actuar nel Festival de Santander el 11 d'agostu, encargándose de la parte musical de la representación d'El gatu con botes nel Palaciu de Festivales xunto a les marionetes y dirección escénica de la compañía Per Poc.