Asturies dexa de ser una potencia eléctrica en cerrando l'añu pasáu cola menor producción en delles décades

La producción d'enerxía eléctrica n'Asturies fundió l'añu pasáu hasta'l so nivel más baxu cuandu menos dende 1990, cuando empieza'l rexistru históricu ellaboráu pola Sociedá Asturiana d'Estudios Económicos ya Industriales (Sadei). Asina, en 2023 la xeneración d'eletricidá na rexón foi de 9.424 xigavatios por hora (GW/h), una cayida del 27% al respeutive del añu anterior y una cifra inclusive inferior a la de 2020, el primer añu de la pandemia de covid, cuando bona parte de l'actividá económica tuvo temporalmente paralizada polos confinamientos. 

A pesar de los paulatinos zarros de plantes térmiques de carbón nel Principáu (namás queden les de Sotu Ribera y Aboño), esta enerxía, que cunta tamién los ciclos combinaos de gas d'EDP, siguió siendo en 2023 la principal fonte de xeneración, apurriendo 6.538 XW/h, esto ye, casi'l 70% del total. Sicasí, esta producción sufrió un esbarrumbe interañal del 37,8%. 

Más acusáu entá foi'l retrocesu de la enerxía hidráulica, del 57,8% al respeutive d'un añu primero. Los ríos y preses d'Asturies fixeron posible la xeneración de 1.504 GW/h. 

Y tocantes a la eólica, a pesar de ser la tercera n'aportación al mix (un total de 1.381 GW/h), el so amenorgamientu interañal foi muncho más suave, del 4,2%.

Estos datos guarden coherencia colos publicaos va unes selmanes pol Institutu Nacional d'Estadística (INE) qu'indiquen qu'Asturies foi la tercer comunidá autónoma onde más cayó l'actividá fabril en 2023. L'índiz de producción industrial del Principáu baxó'l 4,2%, un retrocesu más de cinco vegaes perriba del esperimentáu nel conxuntu d'España (0,8%) y el más acusáu per detrás de los rexistraos en Murcia (8%) y Cantabria (5,9%). 

Yá apuntaba l'INE que'l mal comportamientu del sector secundariu asturianu obedeció principalmente a la menor producción enerxética. Tamién influyó la parada d'ún de los dos fornos altos de ArcelorMittal, primero (hasta febreru) pola baxa demanda y depués (ente marzu y xunetu) pola mor de la quema asocedida'l 22 de marzu. 

Coles mesmes, nel esbarrumbe de la xeneración influyeron les midíes d'aforru y eficiencia de families y empreses. Según l'Institutu pa la Diversificación y Aforru de la Enerxía (IDAE), los edificios suponen alredor del 30% del consumu enerxéticu n'España.