Les pintures del Conventín esperen pola rehabilitación proxectada va seis años

Cola restauración de los murales de San Salvador de Priesca entamada y la variante de la carretera p'alloñar el tráficu del templu en procesu de contratación, la recuperación del prerrománicu de Villaviciosa queda pendiente agora de la proxectada intervención nes pintures del Conventín de Valdediós. Trátase d'una ayalga histórica-artística que se perdió en gran parte y que la so conservación resultó especialmente perxudicada a lo llargo de los sieglos pola presencia constante de mugores nel interior del milenariu templu. Asina figura nos estudios previos a l'actuación que se fixeron fai yá seis años y qu'afitaben el costu de los trabayos de restauración en 785.00 euros. 

Cuando se construyó'l templu por orde del Rei Alfonso III nel tramu final del sieglu VIII, tolos murios taben llucíos, con un variáu programa iconográficu y decoración xeométrica seriada. Sicasí, un elevadísimu porcentaxe d'esta decoración perdióse, anque en dellos casos permanez oculta debaxo d'antiguos morteros o estratos de pintura. Pa tratar de revertir esta situación, los técnicos plantegaron en 2018 una actuación pola qu'el Conventín sigue esperando y que daría empiezu con una llimpieza superficial pa la eliminación de tou'l polvu y los depósitos sueltos sobre los murales, mesmo que la retirada de los productos que se fueron añediendo col pasu del tiempu o les aportaciones cromátiques feches a lo llargo de la última y polémica restauración. 

El plan pa esta rehabilitación sigue por un afitamientu estratigráficu que permita dar estabilidá al conxuntu pictóricu nes zones con oquedales o con perdida de consistencia. Amás, tamién cuenta facese un tratamientu de caltenimientu y restauración sobre tolos materiales pétreos de la ilesia (pilastres, xambes, dinteles de puertes y ventanes, bases, capiteles o fustes), xunto a retoques que xeneren una visión harmónica del conxuntu, pero ensin incluyir nengún tipu de tratamientu cromáticu. 

En rematando toos estos llabores de restauración del interior de San Salvador de Valdediós, los técnicos encamienten l'entamu d'un plan de caltenimientu preventivu y de caltenimientu periódicu, mesmo del edificiu como de la so redolada y los sos bienes. Asina, plantégase la revisión de los zarramientos y otres midíes concretes pa torgar el pasu del agua al interior del edificiu, habilitar un sistema de ventilación que permita amenorgar la concentración de mugores, crear perforaciones nos ventanales pa ventilar el templu, asitiar filtros ultravioletes nos cristales y especialmente nel vanu de la tribuna central, executar una llimpieza periódica de les fábriques esteriores con medios mecánicos o llevar a cabu controles de la crecedera de plantes superiores nos murios y cubiertes, mesmo que llabores periódicos de segáu de la vexetación y d'eliminación d'insectos nel interior de la construcción. Pa rematar, los técnicos abogen por un proyectu de llume qu'ayude al caltenimientu de les pintures. 

A la espera de que pueda entamase esta actuación en fondura, pa la que nun hai conseñamientu presupuestariu nin a nivel rexonal nin estatal, les últimes obres en San Salvador executáronse en 2022 y consistieron na renovación de la cubierta p'acabar colos desprendimientos.