Bea Villamarín axunta les obres de Juan Quiñones, Carlos Tárdez, Alejandro Quincoces, Rafa Rollón o Cova Orgaz

Una muestra colectiva qu'axunta la obra d'una decena d'autores, y na que cada artista interpreta la realidá al traviés del so propiu prisma, "prindando momentos, emociones y paisaxes d'una mena personal y distintiva", como se describe nel catálogu de la muestra. La Galería Bea Villamarín acueye hasta'l 4 d'abril una esposición colectiva na que se recueyen les obres d'artistes bien variaos, como ye'l casu de Carlos Tárdez, Juan Miguel Quiñones, Kiko Miyares, Alejandro Quincoces, Rubén Martín de Lucas, Rafa Rollón, Cova Orgaz o Rebeca Ferrero. "Puede vese dende la meticulosa atención al detalle hasta la espresión xestual y astracta. Cada obra convídanos a cavilgar sobre la complexidá y la guapura de la esperiencia humana", espliquen dende l'espaciu artísticu de la cai San Antonio de Xixón. Les propuestes que van poder ver los visitantes nesti espaciu a lo llargo del próximu mes y mediu tomen dende los cuadros de polos de xeláu de Juan Miguel Quiñones realizaes n'ónix, piedra preciosa o resina, a les pieces d'animales de cartón policromáu de Cova Orgaz, nes que pueden vese perros "teckel" o gochinos. Tamién se recueyen los paisaxes urbanos del pintor Alejandro Quincoces, nos qu'espresa'l so gustu polo cotidiano, por aciu d'olios o acuareles. O más exemplos como los códigos ocultos de les imaxes de cine que reproduz Rafa Rollón nes sos creaciones, y tamién les pieces de madera de pinu y policromía realizaes por Kiko Miyares.