Daorje cuenta crear 300 empleos cola so entrada na eólica marina dende El Musel

El grupu Daorje, con sede n'Avilés y dedicada a la prestación de servicios a compañíes del sector industrial, enerxéticu y medioambiental, anunció esti día que va dar el saltu al sector eólicu marín con una nueva empresa filial con sede nel puertu xixonés d'El Musel que va dar empléu directu a unes 300 persones, qu'axuntándo-y l'indirectu podría algamar unes 800. Amás, cunta con una cartera de pidíos de 1.200 millones d'euros.

Según el presidente de la empresa integrada nel grupu Zima, Miguel Zorita Llees, el proyectu, denomináu Dea Astúrica, alcuéntrase en fase d'inxeniería y la idea ye dar el saltu a la fabricación, especialmente de plataformes flotantes de xeneración d'enerxía eólica marino.

La nueva filial va tener una facturación añal d'unos 300 millones d'euros y una capacidá pa procesar 80.000 tonelaes d'aceru pa la fabricación d'estes estructures flotantes.

La previsión ye que de magar 2027 la demanda de plataformes eóliques marines "va ser brutal" y fai falta crear una cadena de suministru d'esti material pa tol mundu, que ye la empresa na que se va a embarcar agora'l grupu.

El presidente del Grupu Daorje foi recibíu esti día xunto a otros directivos de la empresa pol conceyal de Desenvolvimientu Urbanu y Económicu del Conceyu d'Avilés, Manuel Campa, y el responsable d'Empléu, Juan Carlos Guerrero, con motivu del cincuenta aniversariu de la so creación.

Pa Zorita Llees, cumplir mediu sieglu de vida ye una auténtica "heroicidá", dempués de superar primero la crisis de 2008 y dempués la de la pandemia sanitaria y siguir siendo una de les empleadores más importantes d'Asturies.

La plantiya de la empresa anda ente los 1.500 y 2.000 trabayadores, dependiendo de les paraes de les compañíes a les que-yos da serviciu como ye'l casu de la multinacional siderúrxica ArcelorMittal xunto con otros grandes grupos industriales y enerxéticos del país.

L'Autoridá Portuaria de Xixón anunció en xineru un trámite de competencia de proyectos pal otorgamientu d'una concesión nel cai Romualdo Alvargonzález pa la construcción y esplotación d'un centru loxísticu ya industrial de producción de componentes p'aeroxeneradores marinos.

A esi trámite aportaron dos empreses (Duro Felguera y Zima), que taben somorguiaes nun procesu de negociación "que permitiría algamar un alcuerdu pal desenvolvimientu conxuntu d'un únicu proyectu".