Venticuatro de los 900 meyores MIR fadrán la especialidá n'Asturies

Venticuatro médicos que quedaron clasificaos ente los 900 meyores d'España nel últimu exame MIR escoyeron el Principáu pa realizar la especialidá: 23 fadránla nel Hospital Universitariu Central d'Asturies (HUCA, Uviéu ) y 1 nel Hospital Universitariu de Cabueñes (Xixón). 

Esti resultáu ye meyor que'l llográu nos años anteriores. En 2023, de los 1.000 primeros vinieron formase a la rexón 20; en 2022, fueron 25 del primer millar; y en 2021, los qu'escoyeron hospitales asturianos pa especializase fueron 21 de los 1.000 primeros.

Como vien pasando davezu, pediatría, dermatoloxía, cardioloxía, ciruxía plástica y aparatu dixestivu son delles de les disciplines escoyíes polos MIR con meyores puestos pa escoyer. Nesta ocasión, asitiaron tamién nos puestos cabezaleros, neuroloxía, xinecoloxía, oncoloxía, traumatoloxía y oftalmoloxía. La médica residente que llega con meyor puntuación ye Raquel Santos-Juanes, que llogró'l puestu 71 nuna preba a la que se presentaron 12.721 graduaos en Medicina y va especializase en dermatoloxía nel HUCA. 

Na primer xornada d'elección de places, rescampló l'estelante tirón de la dermatoloxía, que la tien escoyida l'apolmonante cifra de 88 de los 300 primeros del MIR.