L'archivu documental d'AZSA ye de los meyor conservaos d'España y el material usáu pa fabricar les caxes que lu contienen tien muncho que ver

Alfonso García Rodríguez ye l'archiveru d'Asturiana de Zinc (AZSA). Defende qu'el cinc ye un gran material conservador y prueba d'ello son les 200 caxes nes qu'empezaron a almacenase les cuentes y cartes de la fábrica dende 1833 a 1956. "Esos documentos solo pidieron llimpieza", detalla l'archiveru de la planta de San Xuan de Nieva, que va unos díes faló de la esperiencia como guardián de los documentos históricos de la metalúrxica nes xornaes de Conservación y Restauración entamaes pola Escuela Superior d'Arte del Principáu d'Asturies (ESAPA). Tamién intervinieron José Ramón García, director del Muséu Marítimu d'Asturies, en Lluanco, y Gustavo Martínez Pañeda, que faló del archivu ya intervenciones d'Hunosa nel patrimoniu industrial. 

García Rodríguez ufiertó retayos de la hestoria de la Real Compañía d'Arnáu y tamién d'AZSA. Faló del caltenimientu de los equipamientos industriales d'Arnáu. "Desconozse l'autoría pero daquién ente 1884 y 1885 empezó a guardar documentación en caxes de cinc, dos al añu, pa caltener les cartes y les cuentes y anguaño nun ye posible atopar una documentación como esa n'España", indicó l'archiveru, qu'avanzó amás qu'en 1997 empezárase a dar forma al cuidáu archivu de la empresa. "Guardárase separáu de la paré y del suelu, alloñáu de madera, midíes que fueron providenciales pa cuntar con esi material que taba como taba, pero esiste", recdalcó pa rescamplar dempués el "arca de Noé" que conforma l'archivu de la fábrica: "ferramientes, instrumental, maquinaria representativa d'una firma qu'inda sigue n'activu,... Lo primero foi caltener el patrimoniu, tenemos tradición oral, imaxes y les puertes abiertes pa investigadores con documentos técnicos, del día a día, sobre fabricación, producción, incidentes...", destacó García Rodríguez. Y tou en 1.400 metros d'estanteríes y cuasi 4.000 llibros, ente otros y too encuriosao por categoríes: axencies, almacenes, maderes, minerales, espedientes, negativos, fototeca,... 

"El nuesu catálogu tien munches posibilidaes pa la recuperación de cristales, metales, papeles,... que pongo a disposición", apuntó l'archiveru que celebra "que nun se tiró nada" o apenes nada de la documentación que sofitó'l complexu industrial, primero mineru d'Arnáu y darréu cola fábrica de cinc de San Xuan de Nieva.