El Muséu Belles Artes amplía la so colección de pintura del XIX
Eugenio Lucas Velázquez y Eduardo Rosales debuten nel centru asturianu nun nuevu depósitu del Prado
"La fonte, cuadru de costumes de les cercaníes de Santiago de Galicia", de Dionisio Fierros. / Muséu de Belles Artes d'Asturies
El Muséu de Belles Artes d'Asturies incorpora, al traviés d'un nuevu depósitu del Muséu Nacional del Prado, obres de dos artistes inéditos hasta agora nes sos sales, Eugenio Lucas Velázquez y Eduardo Rosales. Con ellos "completa y ameyora" los sos fondos decimonónicos, pero nun son les úniques novedaes na colección asturiana, porque nel mesmu depósitu, realizáu nel marcu del programa "El Prado estendíu", van llegar otros dos cuadros, d'Antonio María Esquivel y Dionisio Fierros, yá representaos na so esposición permanente. Coles cuatro obres que van llegar a lo llargo d'esti añu, la pinacoteca asturiana va reforzar la so colección de pintura del XIX y va ufiertar una panorámica más amplia de les corrientes y estilos artísticos d'aquel sieglu.
"Semeya de neña con roses" d'Antonio María Esquivel. / Muséu de Belles Artes d'Asturies
Les obres cedíes per El Prado al Belles Artes en depósitu son "Semeya de neña con roses" (1834), d'Antonio María Esquivel (Sevilla, 1806-Madrid, 1857); "Majas nel balcón" (1862), d'Eugenio Lucas Velázquez (Madrid, 1817-1870); "La fonte, cuadru de costumes de les cercaníes de Santiago de Galicia" (hacia1864), de Dionisio Fierros (Val.louta, Asturies; 1827-Madrid, 1894) y "La celda prioral del Monesteriu d'El Escorial" (hacia 1864), d'Eduardo Rosales (Madrid, 1836-1873). Los cuatro van incorporase llueu a la colección del muséu asturianu.
"Majas nel balcón" d'Eugenio Lucas Velázquez. / Muséu de Belles Artes d'Asturies
Eduardo Rosales ye "ún de los artistes polos que más naguaba y esperaba" el Belles Artes, que con él va cubrir una llaguna importante na so colección de pintura del XIX. "La celda prioral del Monesteriu d'El Escorial", la obra qu'El Prado-y apurrirá en depósitu, ta espuesta anguaño nes sales de la pinacoteca nacional, formando parte d'una amuesa dedicada al pintor. Nella apaez representáu un interior arquitectónicu, ensin presencia humana, con una composición horizontal y una puerta abierta nel llateral derechu qu'espande y allixera la escena. Rosales yera, espliquen dende'l Belles Artes, "un pintor mui curiosu a la de preparar los sos llenzos, con llargos procesos de trabayu sobre'l papel", que solía recurrir a fondos históricos reales.
"La celda prioral del Monesteriu d'El Escorial", d'Eduardo Rosales. / Muséu de Belles Artes d'Asturies
Eugenio Lucas Velázquez, l'otru artista debutante nel Belles Artes, va ingresar nél col cuadru "Majas nel balcón", nel qu'una moza tocando una guitarra, con un llamativu vistíu y mantiella, ye representada asomada a un balcón y flanqueada por una muyer con un llibru na mano y otru par, más alloñaes. L'artista establez un xuegu de miraes ente toos esos personaxes y l'espectador. El so eclecticismu, la so "gran imaxinación" y les referencies a los maestros que lu precedieron caractericen la producción d'Eugenio Lucas Velázquez.
La relación ente El Prado y el Belles Artes vien de finales del sieglu XX y concrétase nel depósitu de 55 obres –49 pintures y seis escultures– del muséu nacional, a les qu'a lo llargo d'esti añu van axuntase les cuatro anunciaes esti día, hasta un total de 59.
“Cola ayuda de la Conseyería de Cultura, Política Llingüística y Deporte del Principáu d´Asturies”.
- Gran éxito del tren madrugador a Madrid, que los empresarios piden que llegue aún antes y sin más paradas
- Barbón lanza un recado a Felipe González: 'Estoy muy orgulloso de Zapatero, demuestra cómo hay que ser un ex
- Un coche de alta gama alquilado, el maletero abierto y una visita al dentista: la intrahistoria de la fuga de película de un preso en Siero
- Buscan a un preso fugado en Asturias durante un traslado: se metió en un maletero tras salir del dentista en Siero
- Sindicatos y patronal intentan salvar 'in extremis' un convenio que evite la huelga de 27.000 trabajadores
- Patronal del metal y sindicatos salvan 'in extremis' (y por ahora) la huelga de 27.000 asturianos: así es el preacuerdo
- De rojo y con zapatillas: Letizia apuesta por su color fetiche para su gran cita en Oviedo
- Asturias lanza ya su reforma legal para los pisos turísticos con el objetivo de que esté en vigor en el verano
