Fracasu de la ufierta MIR de Familia: places ermes nestos dos grandes conceyos

Yá nun ye abondo con convocar places MIR de Familia p'atraer médicos. Agora'l problema ye que les nueves xeneraciones de graduaos en Medicina pueden refugar el puestu ufiertáu pa realizar una especialidá y optar por repitir l'exame al otru añu en busca d'un númberu meyor que-yos permita aportar a la especialidá pola que naguen. Y depués, rizando el rizu, tán los qu'escueyen una plaza de manera oficial, salen nun llistáu del Ministeriu de Sanidá y, de siguío, arrepiéntense y nun lleguen a tomar posesión. Y entós esi puestu queda ermu. 

Esto postrero ye lo qu'acaba d'asoceder na sanidá asturiana (y n'otres comunidaes autónomes). Y la consecuencia son ocho places de Familia vacantes: cuatro del área sanitaria de Cangas del Narcea, dos del área de Xarrio y... lo más ablucante, una nel área d'Uviéu y otra nel área d'Avilés. 

Esta enumeración vien certificar que les places MIR ermes yá nun son un fechu indeseáu pero esclusivu de les ales d'Asturies. Otra manera, inclusive nel centru de la rexón queden ensin cubrir puestos de la especialidá na que se rexistra un mayor déficit de facultativos y una mayor crisis de prestíu a los güeyos de les nueves xeneraciones de médicos. 

Sabíase que'l Serviciu de Salú del Principáu (Sespa) convocara 62 places de médicu internu residente (MIR) pa realizar la especialidá de Medicina Familiar y Comuñal. Ye la cifra avezada nos últimos años, dempués de los recortes introducíos pol Gobiernu central como respuesta a la crisis financiera mundial qu'impactó con fuerza en 2010 y los años vinientes. Sabíase tamién que, depués de la primer vuelta d'axudicación de places, quedaren vacantes ocho: cuatro del área sanitaria de Cangas del Narcea, dos de la de Xarrio y dos de la de Les Arriondes. 

Y sabíase que, nuna segunda vuelta entamada pol Ministeriu de Sanidá pa cubrir les 459 places de Familia vacantes en toa España, de les ocho ufiertaes n'Asturies axudicáronse cuatro: les dos de Les Arriondes y dos de Cangas del Narcea. Ello ye que les ermes pasaron a ser cuatro: dos nel área sanitaria I (noroccidente, con cabecera en Xarrio ) y dos nel área II (suroccidente, con referencia en Cangas del Narcea). Eses cuatro vacantes implicaben un meyor resultáu asturianu qu'en 2023 (cuando fueren cinco), y tamién un balance más favorable que n'otres comunidaes autónomes. Depués d'esa segunda vuelta, nel conxuntu del país, los puestos ermos de Medicina de Familia yeren 246, más del doble qu'un añu primero. 

Y depués llegó l'últimu pasu: la toma de posesión de les places escoyíes. Y el xarru d'agua frío n'Asturies ye qu'a eses cuatro vacantes axuntáronse-yos otres cuatro por inasistencia de los candidatos que les escoyeren. Y la circunstancia más llamativa: qu'ente eses cuatro nueves vacantes figuren dos de les árees centrales, una nel área sanitaria d'Uviéu y otra na comarca d'Avilés.

“Cola ayuda del Gobiernu del Principáu d´Asturies”.