Les meriendes de "Pastor", el raposu que tolos díes va a alimentase con una familia de Villaviciosa

Los raposos son unos animales mui cucios ya intelixentes, pero tamién de lo más desconfiables. A pesar d'ello, esti cautelosu depredador ta volviéndose cada vez más coraxosu y empieza a averase a los pueblos, sobremanera en dómina primaveral de cría y nacencia d'unos cachorros a los que tien qu'apurrir muncho alimentu. Ye lo que ta pasando nel barriu de La Rotella de la parroquia de Celada (Villaviciosa), a les puertes de la vivienda de Juan Manuel Arenas, Eugenia Fernández y la so fía Lola, d'ocho años, a la qu'un raposu llega con naturalidá cada día, a última hora de la tarde, a la gueta de comida. 

"Va dos meses que vien diariamente al escurecer, primero que s'encienda la lluz pública. Xixílanos y, cuando ponemos a la entrada de casa la comida a los nuesos siete gatos, apaez. Come de too, carne y esllava de la nuestra comida, pero lo que más-y gusta ye lo que tenemos especialmente pa los nuesos gatos, como'l pollu', los snacks o les croquetes", espliquen estos vecinos, ablucaos por esta desavezada presencia a la de la merienda o la cena.

Como bonos amigos de los animales, Juan Manuel y Eugenia dicen tar encantaos coles visites del astutu animal. "La nuestra fía Lola ta emocionadísima de velu tolos díes y yá lu bautizó col nome de “Pastor” porque diz que-y recuerda a un perrín pastor alemán. Sicasí, creemos que puede ser una fema moza qu'acaba de parir y que, por eso, dacuando lleva na boca hasta los táperes enllenos de comida, suponemos que pa les sos críes", amiesten sobre'l "nuevu vecín", que paez dexar a un llau la so rocea p'averase a merendar o a cenar ensin nengún tipu de precuru.

Según indiquen naturalistes y vecinos de los pueblos, conozse qu'últimamente hai un resurdir d'esti preciosu mamíferu n'Asturies. Siempre foi un animal común abondo y abondosu na rexón, pero, de secute, va dos décades empezó a baxar la so población. El melandru pudo mover al raposu de delles zones, a lo que s'axuntaron enfermedaes como la sarna o la parvovirosis. Sicasí, poles últimes observaciones paez que se vuelve a recuperar la población. 

Agora, en Celada, la familia Arenas Fernández espera cada nueche la ablucante visita. "Esti raposu o raposa yá nun tien mieu a los nuesos gatos, nin s'asusta con nós, porque arímase a escasos trés metros. Suponemos que tien de saber que-y apurrimos comida, porque ye mui cuciu ya intelixente, y hasta xuega colos nuesos playeros y la escoba que tán delantre de casa", indiquen.

“Cola ayuda del Gobiernu del Principáu d´Asturies”.