L'abellugu de Brañagallones va abrir a lo llargo del branu n'encarando obres urxentes de meyora

Nun ye polo que s'allampiaba pero cuando menos ye daqué. L'abellugu de Brañagallones, nel Parque Natural de Redes, nel conceyu de Casu, va abrir llueu les sos instalaciones pa que los amantes del monte puedan utilizales a lo llargo de los meses de branu. La intención ye que l'abellugu de montaña permaneza abiertu siquier los meses de xunu, xunetu y agostu. Seique les instalaciones nun tean al cien por cien nesos meses pero sí van poder tar abiertes al públicu. Pa ello, la Federación de Montaña del Principáu d'Asturies, encargada de la xestión del abellugu, ta realizando estos díes obres de meyora. Trabayase principalmente na puesta a puntu de los sistemes de calefacción y agua caliente, ún de los grandes problemes del abellugu. L'actual sistema eléctricu, con dos xeneradores de gasoil, provocó nos últimos años constantes problemes de suministru, ya inclusive apagones, al quedar obsoletos. 

Brañagallones tendría de tar abiertu dende Selmana Santa, a finales de marzu, pero los defectos nel edificiu retrasaron la so apertura hasta xunu. 

Tou ello, a la espera de l'allampada y anunciada obra de reforma del equipamientu, que va tener un presupuestu de 700.000 euros, según anunció apocayá la conseyera de Cultura, Política Llingüística y Deporte, Vanessa Gutiérrez. Hasta agora solo se supiera de la esistencia d'una partida de 300.000 euros de fondos europeos p'ameyorar la eficiencia enerxética. 

El teyáu del edificiu ta en permales condiciones y tol complexu aliméntase d'esos dos vieyos xeneradores de gasoil que, pa enriba de gastar muncho, estrópiense davezu. Pa iguar tolos defectos tán proxectaes unes obres que suponen un arreglu integral del teyáu, impermeabilización y estructura soporte (rastreles), mesmo que la meyora de ventilaciones, chimenees y la instalación de ventanes oscilobatientes tipu "velux". Ún de los oxetivos del Principáu, pa lo que se cunta con financiación europea, ye que l'abellugu seya "verde", que funcione con enerxíes anovables: "Brañagallones tien de ser un exemplu de sostenibilidá", sorrayó la conseyera de Cultura y Deportes nuna comparecencia recién na Xunta Xeneral del Principáu. 

La gran obra, depués del branu

La previsión ye qu'esos trabayos entamen depués de la temporada de branu, el próximu mes d'ochobre, y que s'allarguen tol iviernu. La fecha de finalización ye incierta una y bones la marcha de la obra va depender en gran midida de les condiciones meteorolóxiques. 

L'abellugu de Brañagallones construyóse nos años sesenta y atópase a 1.215 metros d'altitú. Primeramente, foi un abellugu de cazadores, y darréu convirtióse nun hotel de luxu. Dende l'añu 2016, esti edificiu propiedá de l'Alministración Autonómica del Principáu d'Asturies, ta xestionáu pola Federación de Montaña d'Asturies (FEMPA), al traviés d'un conveniu robláu ente la mesma Federación y la Dirección Xeneral de Deportes del Principáu d'Asturies. La Federación executa estos díes trabayos pa poder abrir pel branu.

“Cola ayuda del Gobiernu del Principáu d´Asturies”.