Asturies encadena 10 meses como la provincia peninsular col combustible más caru: estes son les razones

Asturies encadenó diez meses de siguío como la provincia peninsular col combustible más caru, según los informes mensuales de distribución de carburantes qu'ellabora la Comisión Nacional de los Mercaos y la Competencia (CNMC). 

L'últimu boletín publicáu, el correspondiente al mes de marzu, rescampla que "Asturies y Guipúzcoa volvieron ser les provincies cola gasolina 95 más cara y asina foi a lo llargo de los postreros quince meses". Y amiesta que "con relación al gasóil A, tamién Asturies foi, por décimu mes consecutivu, la provincia peninsular col preciu de venta al públicu promediu más altu. Siguiéronla, mesmo que'l mes anterior, Guadalaxara y Guipúzcoa".

En marzu, el preciu mediu del llitru de gasolina 95 n'Asturies foi de 1,688 euros, el más altu ente los territorios peninsulares. Enllenar el depósitu d'un turismu (50 llitros) cuesta 84,40 euros frente a los 79,98 euros de media n'España. Esto ye, los asturianos paguen cinco euros más. Al respeutive del gasóil A, Asturies tamién encabeza'l llistáu de les rexones col combustible más caru con un preciu de 1,606 euros el llitru. Nesti casu enllenar el depósitu cuesta 80,30 euros frente a 75,26 de media n'España. La diferencia vuelve superar los cinco euros. 

La CNMC nun esplica los motivos polos qu'Asturies ye la rexón peninsular col combustible más caru, anque sí apunta que nes provincies onde los precios son más baxos hai una importante presencia d'estaciones de serviciu independientes que "disciplinen el mercáu hacia precios más amenorgaos". 

La mayoría de les gasolineres d'Asturies tán integraes nes grandes redes de distribución de Repsol, Cepsa y BP y, amás, Asturies y Cantabria son les úniques comunidaes autónomes que nun tienen oleoductos. El combustible aporta a Asturies principalmente per barcu procedente de les refineríes de Vizcaya y A Coruña y almacénase nos depósitos d'hidrocarburos del puertu d'El Musel de Xixón, dende onde se distribúi en camiones cisterna. Les asociaciones d'empresarios d'estaciones de serviciu d'Asturies afirmen que los precios de venta al públicu de los combustibles tan perriba de los d'otres rexones "porque los costos de loxística son mayores" y ponen l'acentu nos precios qu'ufierten los operadores qu'almacenen combustible nel puertu d'El Musel.

“Cola ayuda del Gobiernu del Principáu d´Asturies”.