L'esfuerzu económicu p'arrendar un pisu n'Uviéu supera al d'una hipoteca

L'esfuerzu económicu pa pagar la hipoteca d'un pisu incrementóse nos últimos años de resultes de la xubida de los costos financieros. Pero l'aumentu d'esfuerzu foi muncho mayor nel casu de los arriendos, hasta'l puntu de que la tasa d'ingresos que se destinen a pagar la renta media d'un pisu n'Uviéu yá supera la tasa dedicada a los pagos periódicos del préstamu pola compra d'una vivienda na capital del Principáu. 

Según un estudiu de la consultora inmobiliaria internacional Colliers, qu'utiliza datos del Ministeriu de Fomentu y de los principales portales inmobiliarios, les tases d'esfuerzu p'arrendar disparáronse "pola fuerte crecedera de les rentes d'alquiler", una situación que les axencies inmobiliaries de la rexón venceyen cola escasez d'ufierta de pisos que xeneró l'aprobación de la llei de Vivienda. 

Según l'estudiu de Colliers, qu'analiza la situación de les capitales de provincia, alquilar una vivienda de 75 metros cuadraos n'Uviéu supon una tasa d'esfuerzu del 22,8% de los ingresos disponibles d'un llar mediu dempués d'impuestos. Esi porcentaxe supera la tasa d'esfuerzu hipotecariu pa la compra d'una vivienda tamién de 75 metros cuadraos n'Uviéu, que ye del 20,2%. Esti porcentaxe representa la renta disponible qu'un llar mediu tien d'emplegar pa facer frente a los pagos periódicos d'un préstamu hipotecariu con una relación de "loan to value" (porcentaxe ente la cantidá del préstamu que se llogra y el valor de la propiedá que s'utiliza como garantía) del 80%, colos tipos d'interés medios actuales y un plazu de 25 años. 

Sicasí, les tases d'esfuerzu tantu p'arrendar como pa mercar n'Uviéu tán llueñe de los máximos rexistraos n'España. En Barcelona la tasa p'alquilar algama'l 44,50% de los ingresos y en San Sebastián la tasa pa mercar llega al 49,80%. 

A lo llargo de los últimos años la tasa d'esfuerzu aumentó más nel alquiler. Un estudiu publicáu esti día pol portal Fotocasa señala que n'España'l preciu de los arriendos incrementóse'l 78% mentanto los últimos 10 años (d'abril de 2014 a abril de 2024) y que nel casu d'Asturies l'aumentu foi del 64%. Nel últimu añu, cola entrada en vigor de la llei de Vivienda, la medría del preciu n'España foi del 5% y n'Asturies del 17%. 

Va unos díes conocióse que'l Tribunal Constitucional avaló la mayor parte de la llei estatal de Vivienda en refugando la mayoría de les impugnaciones a la norma efectuaes pola Xunta d'Andalucía, magar anula l'artículu que rixe la vivienda protexida.

“Cola ayuda del Gobiernu del Principáu d´Asturies”.