El Principáu alcuentra'l cadabre d'una osa que se despeñó nun esgoladoriu de Somiedu

Axentes medioambientales de la Patrulla Osu del Principáu d'Asturies alcontraron va unos díes el cadabre d'una osa despeñada nuna zona de mal accesu en El Val.le (Somiedu), dientro del Parque Natural.

Les primeres hipótesis apunten a que la osa trató de defender a los sos dos esbardos d'un machu en celu y terminó despeñándose por mor de la engarradiella. Los axentes decidieron allegar a la zona en viendo que les críes taben soles, ensin la so madre. L'afayu producióse nuna zona d'esclusión del parque, de muy mal accesu y alloñada de les víes de comunicación, lo que complicó considerablemente l'operativu.

Estos fechos nun son escepcionales na dómina de celu, na que s'atoparon otros exemplares despeñaos por mor de les engarradielles ente machos o depués d'ataques infanticides que dacuando resulten letales pa estos plantígrados.

Los axentes medioambientales de la Patrulla Osu, en collaboración cola Fundación Osu Pardu, traten agora d'atopar a los dos esbardos desapaecíos. El cadabre de la fema yá se treslladó al Centru de Recuperación de la Fauna Silvestre de Sobrescobiu, onde se-y va realizar la necropsia.