Siguiendo'l razonamientu de que la moda ye aquello que primero pasa de moda, los artículos periodísticos cuanto más apegaos tán a l'actualidá primero suelen quedar anticuaos. Quiciabes por eso los que foi publicando Xosé María Rodríguez de Bimeda ente avientu de 2004 y xunu de 2007 nel suplementu «La Nueva Quintana» de LA NUEVA ESPAÑA nun perdieron frescura porque nun facíen referencia a l'actualidá inmediata, anque esta a vegaes sirviera como sida al autor pa ponese a escribir sobre Asturies. Lleelos en xunto nesti llibru, que tien el mesmu títulu que la so columna, permite dase cuenta de la so continuidá y coherencia. Empiecen siendo una reflexión sobre lo que fuimos, lo que somos y lo que deberíemos ser los asturianos, fecha por dalguién con capacidá d'observación, intelixencia y conocimientu del mundu; dalguién esmolecíu pola política, la ecoloxía, la economía, el terrorismu? A midida qu'avancen van faciéndose menos teóricos, y lo cotidiano, inclusive a vegaes lo anecdótico, pasa a ser a menudu'l tema central, con pequeñes chiscadures d'humor.

Tien interés el qu'esti autor, nacíu nel conceyu de Cangas del Narcea en 1956, lleve trenta años viviendo y trabayando en Madrid. La so visión d'Asturies dende la distancia percibe bien les contradicciones d'esta tierra, y la so lóxica entrúgase a menudu poles razones que nos lleven a nun ser, a renunciar a una presencia más activa nel panorama estatal o européu. A vegaes, como cuenta que-y pasaba a Jordi Pujol en Cangas del Narcea, nun topa respuestes: el políticu catalán mirando entusiasmáu los montes del conceyu enllenos d'árboles preguntó poles empreses qu'había del sector del mueble; nun entendía que nun hubiera nenguna. Per otru llau, esa presencia continuada en Madrid sírve-y al autor pa contrastar la realidá asturiana dende los güeyos madrileños. Nel prólogu, Carlos Cuellas cuenta la impresión que-y causaba que'l so amigu Xosé María Rodríguez de Bimeda («abogáu de pleitos probes») falara y escribiera n'asturianu, cuando nin tan siquiera sabía qu'existiera tal llingua.

Tampoco Rodríguez renuncia a la polémica. A ratos escribe n'asturianu occidental, delles veces nel asturianu común y otres faciendo una síntesis ente l'asturianu occidental y l'estándar que, de xuru, va sorprender. Ye un efectu buscáu, una manera de que'l llector reflexione sobre'l soporte llingüísticu y se dea cuenta de que la estandarización de la llingua nun ye un procesu zarráu.