Ricardo Candás (Xixón, 1977) presentóse como escritor ganando'l premiu «Fernán-Coronas» de 2005 con un llibru interesante, Quiciás seya payares, una indagación sobre'l misteriu de la expresión poética. Yeren unos poemes que se podíen poner en relación col esencialismu de Valente, del que figuraben al frente del llibru dos versos reveladores: «Se deshacen/ lentamente la luz y las palabras». Como la del poeta d'Ourense, la poesía de Ricardo Candás enantes de ser comunicación quería formar parte del misteriu de lo oculto. Resultaba una propuesta poética arriesgada, pero que podía abrir un camín atrayente na nuesa poesía, poco transitáu, y asina esperamos con cierta expectación nueves entregues de Candás. Sicasí, hasta la fecha, nun hubo continuidá poética.

Nesti tiempu Ricardo Candás va ganando dalgunos concursos de relatos, participando n'antoloxíes variaes, como si l'enclín poéticu del primer llibru quedara relegáu en favor de la narrativa. Sicasí, los cuentos xuntaos nes Últimes pallabres («Compilación de rellatos» se subtitula, como queriendo dar a entender que'l llector va alcontrar cuentos mui heteroxéneos ensin unidá determinada, anque lo cierto ye que tamos delantre d'un llibru bastante compactu) nun consiguen facenos olvidar que Candás ye poeta. Non porque seyan relatos de sensibilidá a flor de piel, o porque los argumentos seyan poéticos, nin munchos menos. Estes histories acérquense al tremendismu, con asesinatos violentos y muertes terribles, con personaxes que se mueven pel marxe de la sociedá o que sufren llocura o abandonu.

Pero son relatos construyíos con precisión poética, trabayando cada frase con procuru, como si siguiera la máxima d'aquellos versos del so llibru de poesía: «Coyí'l verbu/ y mazquélu sele/ quitándo-y les espines,/ cuspiendo/ lo que nun valía». Ricardo Candás llogra asina una buscada economía discursiva, pero la narración nun fluye suelta, como si'l preciosismu pintara meyor pal versu que pa la prosa, pa la que convién más l'acumulación narrativa que la excesiva sintetización.

Igual por eso los personaxes del llibru, a pesar de les sos peripecies tremendes, de les sos vides radicales, nun terminen d'entrar nel corazón del llector. L'esqueletu de la narración ta fechu, los argumentos mantienen l'interés, pero en xuntu al llibru sóbra-y esencialidá y fálta-y freba narrativa, especialmente esos detalles (qu'a vegaes rellumen nel textu: esi matrimoniu al que-y gustaba sentir a Niti Colsa nel Simca 1200, esa pareya de gatos que se llamen Ortega y Gasset...) que dan vida a lo que d'otra mienta ta más cerca del esquema que del cuentu.