L'asociación La Compaña del Ronchel, en collaboración col Ateneo Obrero y col sofitu del Conceyu de Villaviciosa edita un nuevu númberu de la revista "Friúz". Con sitiu pa temátiques variaes, les entrevistes, noticies, reportaxes, artículos y collaboraciones lliteraries traten aspeutos culturales n'asturianu dende los conceyos de la Comarca de la Sidra. Coordinada por Lluis Portal y Xuan Pedrayes, nel conseyu de redaición figuren: Miguel González Pereda, Toño García, Salvador Barro, Marga Solares, Macario Victorero, Rosa Fernández y Senén Rivero.
L'asuntu del editorial ye una aciertu incómodu y urxente, que garra puxu nestos tiempos: la constatación d'una Asturies rural erma dientro d'esa España vacía, una realidá que llegó al esmantelar la economía agraria colos afectaos como testigos cuasi mudos. Xuan Pedrayes Obaya fai una llarga y prestosa entrevista a Rodrigo Cuevas, que na portada de la publicación posa, arguyosu, nun corredor que s'asoma a l'amabilidá del nuesu paisaxe. L'artista xenial ye un home de conciencia cultural y ecoloxista, qu'empondera'l pueblu ensin complexos. La rocada retrata al home que nun s'escuende tres el personaxe y empieza repasando'l so periodu de formación, les influyencies estétiques y el determín artísticu escoyíu: "L'arte qu'ún fae debe tar conectáu a tolo que ficieron los nuestros antiguos". El so llabor de busca escarba pel corpus de les músiques y lliteratures tradicionales pa revisales y versionales con elegancia, intelixencia y munchu respetu. Lluis Portal ofrez un reportaxe nel que combina etnografía y biografía, resultando una bona oportunidá p'averase y afondar na figura de María Teresa Villaverde, "Maruxa" o "Tuxa", escritora de Villaviciosa que va ser homenaxeada na 41 Selmana de les Lletres Asturianes, una celebración prevista pa ente los díes 28 de setiembre y 2 d'ochobre. Nacida en 1881 y contemporánea de Cabal, Pachín de Melás y el Padre Galo, tien el so sitiu dientro del Rexonalismu y una presencia lliteraria nel so tiempu seique mui asemeyada a les de María Balbín, Daniel Albuerne o Xosé García Lueso. La so obra ta dafechamente determinada pol entornu cercanu, el contestu de Tornón y la redolada: "De la so abond'arboleda / prienden el ñeru nes rames / los ñervatos y xilgueros / en'es sebies los raitanes". Amás de poesíes publicaes na prensa llocal y nes revistes de los centros asturianos de Madrid y Buenos Aires, Teresa Villaverde escribió n'asturianu correspondencia epistolar y prosa con posibilidaes escéniques; el relatu "Una moza de Tornón en Madrid" foi puntu de partida pa la pieza titulada "Tuxa", estrenada nel añu 2010 pol grupu de teatru "Contraste". De diferentes partes de la so obra yá s'ocuparon los investigadores Etelvino González, Xurde Blanco y el propiu Portal y el llector interesáu puede alcontrar una muestra representativa nos númberos 52, 54 y 65 de la revista Lletres Asturianes, mientres esperamos pola llectura conxunta nuna publicación de tola so obra llocalizada, una novedá editorial que traerá la seronda. Macario Victorero ofrez un nuevu capítulu de la serie "Artes de pesca en Llastres", con semeyes esplicatives pa un relatu minuciosu del trabayu; Mino Cifuentes da cuenta de la efeméride conmemorativa de los 750 años de la Carta Puebla de Maliayo, concedida pol rei Alfonso X el Sabiu; dase anuncia del nomamientu de Miguel González Pereda como primer cronista oficial de Villaviciosa y zarren estes páxines cola traducción d'un fragmentu del cuentu "Bâtard" de Jack London, un testu nel qu'asalta la violencia y la brutalidá recíproca ente'l perru y l'amu.
Diz muncho d'una comunidá que tenga la iniciativa d'echar a andar una publicación periódica. Diz inda más que seya quien a caltenela nel tiempu con variedá y calidá, convertida nun paparitu d'actualidá cultural d'amena llectura.