En Calabria asesinen a un diputáu democristianu. L’atentáu ye reivindicáu por un grupu terrorista venceyáu a les Brigaes Coloraes, agora nomaes Brigaes Coloraes Refundaes. En Florencia, Danielle escucha les novedaes que xurden de la radio con indiferencia. Livia marcha de viaxe de negocios y él tien pendiente trabayu como periodista especializáu en noticies d’astronomía. Too sigue calces normales hasta que Livia desapaez ensin razones nin destín. La policía secreta ponse en contactu con Danielle, fíu d’italianu y asturiana, ya infórmalu de que podría haber dalguna conexón ente l’atentáu, l’actividá criminal de la banda terrorista, que sigue cometiendo crímenes, y la desapaición de Livia, que gasta nome falsu pa tapecer una identidá pasada y pueque presente.
Con esta cadarma de novela negra comienza Los xardinos de la lluna, llibru que firma Francisco Álvarez y que mereció’l premiu Xosefa Xovellanos de novela na última edición. La investigación sobre’l misteriu de les muertes de personaxes d’importancia política a manes d’esti grupu terrorista y la rellación que puea haber con Livia constituyen la primer pata del tayuelu narrativu d’esta novela. Pero convién nun llamase a engañu. A partir d’equí la hestoria trescurre sobre la base de les reflexones y asocesos que configuren el presente y el pasáu de Danielle. La so hestoria personal va mecese cola hestoria de la so familia ya inclusive cola Hestoria d’Italia.
Porque Italia conviértese nun protagonista más de la obra, na segunda apoyadura del edificiu narrativu. Son munchos los escenarios xeográficos italianos, tanto a nivel xeneral (Florencia, Roma, Trieste…) como a un nivel más concretu (cites constantes de cais y places, xardinos, edificios, monumentos…). Cásique la novela recuerda a un llibru de viaxes. Un bon llibru de viaxes, dicho sía de pasu. L’arume de la cultura italiana algama a los alderiques y a los personaxes, a los secundarios y a los escenarios. La lliteratura italiana tamién ta mui presente, con referencies y alcordances, llibros qu’entren y salen del propiu llibru de Francisco Álvarez. Italia va garrando presencia y podemos asegurar que representa un personaxe más y por derechu propiu. Si al volume total de páxines-y quitamos les páxines dedicaes a Italia, bona parte del llibru diba amenorgase, dexando la narración asina más fibrosa, pero tamién más anémica. ¿Que quier dicir esto? Que los socesos esteriores son escasos. Nun presenciamos munchos acontecimientos en cuanto fechos historiables.
La tercer pata del tayuelu consiste nel camín reflexivu de Danielle al rodiu de los fenómenos y cuerpos celestes y el paralelismu que fai colos movimientos y comportamientos humanos. La desapaición de Livia camuda nun abandonu y un reaxustamientu del llugar que Danielle ocupa nel mundu. La novela percuerre una serie de finxos intimistes que sirven al autor pa desentrellizar l’amor y les rellaciones de pareya. El recuerdu de Livia va a poco y a poco alloñándose como esos cometes que pasaron un día cerca de la Tierra. ¿Volverán? Nesi incertidume navega Danielle, quien investiga los asesinatos, masque sía na distancia, tira de contactos, visita ciudaes y amigues, charra con chigreros, almira Taormina o’l Trastevere, alcuerda de cuando conoció a Livia y del viaxe de novios (anque nun casaran) a los xardinos de la lluna... Livia ye un llaberintu vexetal, un misteriu qu’enseña pa tapecer quién sabe qué duldes o cuentes pasaes.
Francisco Álvarez entrega una novela sólida de nueves (depués de la esitosa Durruti) y xuega al engañu. El plantegamientu de novela negra dexa pasu a una novela intimista y viaxera, cásique ensin vida esterior, salpicada malpenes pola investigación de Danielle, que recupera les claves de novela sobre corrupción política, policial y xudicial na recta final del testu. Y al cabu, fala d’una sienda emocional y llírica na que nos reconocemos fácilmente.
Los xardinos de la lluna
Francisco Álvarez
208 páxines, 15,00 euros. Trabe, 2020, Uviéu
