Anque la opinión más xeneralizada diz que la lliteratura n’asturianu xira al rodiu de la poesía, lo cierto ye que, dende finales del sieglu pasáu, ye la novela de xéneru la que goza de les preferencies del públicu, sobre manera la novela histórica. Algunos de los títulos más conocíos d’autores como Xandru Fernández, Xulio Viejo, Esther Prieto, Francisco Álvarez o Xulio Arbesú pertenecen a esti xéneru.
L’esitu d’esti tipu de novela esplícase pola utilización, como material narrativo, de fechos y personaxes de la Historia d’Asturies. Los procedimientos son diversos. Unes veces ofrécense panorámiques amplies, como fai Xosé Mª. Vega en “Un sieglu de nós” (vtp, 1997), mientres qu’otres, los fechos históricos proporcionen un tresfondu significativu a una trama realista, como en “L’arna de San Atanás” (Trabe, 2002) de Pablo Rodríguez Medina. En munchos casos, plantégase la reconstrucción novelesca d’un pasáu poco conocíu, como asocede en “Nunn” (Delallama, 2020) de Xandru Martino, y n’otros –los menos–, ficcionalícense socesos bien documentaos, como fai Antón García na “Crónica de la lluz y la solombra” (Trabe, 2014).
Magar esta pluralidá d’enfoques, y sin dexar de reconoce-y a la novela histórica n’asturianu la capacidá que demostró hasta agora pa compaxinar tratamientos populares, como la narración d’aventures o’l recursu a personaxes históricos carismáticos, con una construcción lliteraria ambiciosa y cuidada, la producción acumulada echa de ver algunes faltes, como la inclusión de la perspectiva de les muyeres –del mundu de les muyeres, mesmamente– y el retratu de la Historia de la clase trabayadora, de la industrial y sobre too de l’agraria.
“Baxo’l pumar”, la primera novela n’asturianu de Marga Pedrayes, llega en buena hora p’ayudar a reparar estes faltes. L’autora, que publicara en 2012 otra novela histórica, “La marca vikinga”, presenta la obra como un rellatu senciellu, destacando l’esfuerzu fechu p’algamar el dominiu de la escritura n’asturianu. Lo cierto ye que, dientro de la so senciellez –ye un rellatu llinial, narráu en primera persona, al filu de la vida del protagonista–, Pedrayes apunta a un oxetivu poco tratáu na lliteratura asturiana, fuera de los rellatos d’influencia etnográfica fechos por escritores como Paquita Suárez Coalla o Montserrat Garnacho. Consigue retratar con verosimilitú, frutu d’una documentación rigurosa, la forma de vida d’un paisanu asturianu de la segunda metá del sieglu XIX, evitando’l sesgu idílicu, cuando fala del trabayu de la tierra, y antiindustrialista, cuando se refier a la mina, qu’encontramos na narrativa realista d’esa dómina. La suya ye una perspectiva respetuosa, que brinda a los enfotos y preocupaciones de la xente trabayador la importancia que merecen.
El protagonista, Colás, vien al mundu por accidente nuna pumarada, polo que crez cola obsesión de llegar a ser llagareru. Pa llograr esti propósitu, vese obligáu a desempeñar distintos oficios. De rapaz trabaya nun molín de marees y más tarde na mina, primero nel llavaderu, onde conoz a la muyer, y depués embaxo la tierra. Al mesmu tiempu, ayuda a la muyer nes xeres agrícoles y gracies a un llagar que-y da’l padre y a la robla d’un contratu de mampostería que-y permite usar la metá de la collecha d’una pumarada, va aprendiendo a facer sidra.
Nel retratu del protagonista ta la virtú y al mesmu tiempu’l pecáu d’esta novela. La obsesión de Colás por ser llagareru y por llegar a poseer la pumarada onde nació faen d’él una persona exemplar. El personaxe distínguese, asina, de los estereotipos sociales vixentes, sobre too de los qu’afecten a los mineros. Sin embargu, precisamente por ello, la figura resultante pierde algo de verosimilitú psicolóxica: cuesta imaxinar un paisanu d’esa dómina tan formal y reflexivu.
Baxo’l pumar
Marga Pedrayes
Cuatro Gotes, 355 páxines, 16 euros
Cola ayuda de la Conseyería de Cultura, Política Llingüística y Turismu del Principáu d’Asturies
