La novela “La reserva protexida de Les Cuenques”, d’Ismael María González Arias (Mael pa les amistaes), ye breve pero non curtia de valires. Soi fan de la so novela de 1992 “El cuartu negociu”, epopeya política de los llíos sangrinos de Serbia-Croacia-Bosnia, pero anagora tornamos sele al requexu del nuestru verde y pequeñu país. Supónse que la reserva protexida ye la que formen los prexubilaos de Les Cuenques, en décades pasaes, baxo’l somantu de los fondos mineros europeos. Por embargu, el puntu de vista principal del rellatu pónlu la protagonista, la xoven Eleonnor Windstone, que ye estadounidense (y xudía) amás de fotógrafa del “National Geographic Magazine”. Ella diz delles veces que la tal reserva protexida aseméyase a les de los indios norteamericanos. Perhí va y con eso márcase una de les claves lliteraries d’esta narración. ¿Y qué se narra? Hai un empiezu y dempués lleemos los diarios secretos de la fotógrafa Eleonnor (Leo de nomatu), escritos del 14 al 25 d’abril del 2001 nuna visita profesional a Asturies. Dempués, con dalgún intermediu, el periodista Mariano Requejo cuenta dende’l 25 de xunu al 1 de xunetu de 2018 el regresu de Leo a España y a Asturies.
Ta claro que les cuencates y los cuencatos protagonicen gran parte del escenariu de la novela. ¿Cómo? Resulta que la revista de Leo dio-y un premiu d’ investigación etnográfica al trabayu d’autoría anónima “La casta de los prexubilaos de les cuenques mineres asturianes”. Arriendes d’eso la fotógrafa enfótase en entrar a lo fondero del asuntu, cosa que nun llogra por variaes circunstancies. Leo ye bastante espabilada como pa conocer el mundu enteru, pero nun conocía tovía Les Cuenques, prubina, hasta que’l escritor, organizador y productor Ismael María González Arias la traxo equí nesti llibru.
Conque con estes blimes Mael, que conoz igual o más que Leo les engañifes del mundu, arma un rellatu divertíu col que pues reyite o inda escacharrate. Y llúcese con comparances étniques y estétiques ente Asturies y otres sociedaes hasta vinir a armala col destín de los fondos mineros y los vezos de los prexubilaos perprotexíos. Y como la novela nun cuenta ser socioloxía, nin infome xurídicu, la ficción pura y dura encaxa en dos niveles. Nel primer nivel pué lleese como crítica social d’un episodiu que tovía colea o como crítica nacional de la nuestra identidá de baxu perfil. L’arma lliteraria ye la ironía burlesca. Nada ni naide, instituciones o persones son lo que parecen: el mesmu personaxe central de Villa, qu’oldéase a Mario Bros nel textu lliterariu, pué oldease tamién, como ciudadanu de la llamada realidá, a ún de los moñecos de la máquina de char sidra. Si les mezcliendes de noticia y bilordiu son l’estáu natural de la opinión y de l’aición entós a les critiques d’Ismael González a tala pasta nótase-yos un ciertu estilu a lo Tom Wolfe.
Nel segundu nivel de la ficción, el más importante, asitiamos la comprendoria vital que surde del diariu de Leo Windstone. Pero a la fin nun soi a escaeceme de que la chica Leo tien un antecedente polo menos nesa otra moza norteamericana, abierta y lliberal como ella, que protagoniza dende Sevilla la novela epistolar de Ramón J. Sender, de 1962, “La tesis de Nancy”. Igual Leo val de discreta reencarnación de Nancy querida por Mael.
La reserva protexida de Les Cuenques
Ismael María González Arias
Trabe, 126 páxines, 12 euros
Cola ayuda de la Conseyería de Cultura, Política Llingüística y Turismu del Principáu d’Asturies
