El 21 de marzu celebramos el Día Mundial de la Poesía, proclamada nel añu 1999 pola UNESCO, en París, col fin de qu’esi día sirva de recordatoriu pa qu’en tolos requexos del mundu podamos disfrutar de versos y facer alcordanza de que la poesía ye necesaria, sanadora del alma y del sufrimientu humanu. Una forma d’animar y favorecer la creación y escuchar versos nes diferentes llingües del mundu. Una forma de reivindicar la llibertá, l’amor y la concordia.
Distintos espacios culturales, instituciones escueles, establecimientos comerciales, bares, y otres entidaes enllenarán Asturies de versos nestos díes Recitales y otros actos nos que se sentirá la voz de los poetes. Llectures que nos recuerden la necesidá de lleer y de recreanos cola poesía. Sicasí, sirva esti día, sobre too, pa que nun decaiga la ilusión por lleer y escuchar versos a lo llargo de tol añu.
La poesía faise ecu de la situación social del momentu, y los versos son tamién una forma de protesta ante les llaceries que nos amaguen
Con versos y cantares recíbennos cuando llegamos al mundu, cuando nos duermen coles primeres añaes, cantaes cola tenrura de la madre, de la güela, y hasta na voz de les hermanes y otres muyeres de la casa. Nun ye que quiera separar a los padres d’esta xera tan prestosa; nes últimes décaes tán incorporándose a compartir al completu’l llabor de la crianza de los fíos. Pero esti aniciu poéticu yera hasta va bien pocu tiempu tienru llabor maternal. Añaes que son poesía y que se repiten nos primeros años de vida pa relaxanos y conciliar el sueñu.
Y de manera más formal, quién nun deprendió un poema de memoria na escuela, versos que nos fueron averando al mundu poéticu, magar que llueu les llectures que nutren el tiempu llibre de la xente seyan más bien en prosa, como si munchos llectores sintieren cierta rocea a lleer y a facer de suyu un poema. Poro, inundar de versos tolos requexos paezme mui importante y hasta necesario. El gran proyeutu de nomar Asturies Capital Mundial de la Poesía, ye una forma d’esparder y da-y puxu a esta fecha tan señalada, una forma de contribuir a estrar de versos el paisaxe de la nuesa tierra.
Fainos falta poesía en tolos momentos de la vida. Estos últimos años van socediendo nos munches calamidaes una tres d’otra, pandemia, naturaleza engafada (volcanes, furacanes y otros fenómenos naturales adversos) y agora la guerra que nos encueye’l corazón. A estos momentos de gafez mundial, tenemos que buscar momentos d’evasión y de disfrute. La poesía faise ecu de la situación social del momentu, y los versos son tamién una forma de protesta y de denuncia social ante les llaceries que nos amaguen. Poesía pola PAZ. Que la poesía sirva de xuntura ente nós, qu’ayude a calmar la llocura, la guerra, y les desavenencies sociales.
