De mozu diba tolos sábados pela mañana a La Ruta col mio collaciu Ferreras. De primeres, parábemos en El Roble, de la cai Begoña, onde tomábemos unes cañúques prestoses, depués colábemos a la llibrería Paradiso a fisgar pente discos y llibros. Siempre’l mesmu ritual, quitanos el secañu pa ser averanos a la cultura. La llibrería asomeyaba ser una ilesia de la imaxinación, con esi arrecendor a papel que nos convidaba a vivir milenta aventures. Ehí garré’l gripe de la llectura, tan prestosu y fundamental na vida.
Tuvo de ser en colexu onde pillare esa enfermedá maraviosa, pero, por desgracia, ellí namái nos enseñaben la lliteratura de vieyo, la lliteratura que contaxa a los neños escontra la llectura. Como maestro que soi avergóñome d’esa actitú qu’entá se da en escueles ya institutos, y sobre tou nos colexos de cures y monxes. Nun somos a pescanciar qu’hai llibros pa cada edá, llibros que s’adueñen de los celebros de los rapazos y nun los suelten, llibros colos que gociar y non sufrir, colos que dalgún día averanos a esa lliteratura p’adultos.
Madres y padres que me lleáis, avezái a los vuesos rapazos a conocer les aventures de papel, anguaño hai toa una lliteratura infantil y xuvenil tan grande como esa que se recueye nesos llibros d’estudiu tan poco adautaos a los estudiantes. Dir a eses llibreríes pa mocinos y mozonos, facé-ylo colos vuesos fíos y fíes, permiti-yos qu’escargateen pente los llibros y regala-yos los que más-yos presten. Cuesten menos qu’un videoxuegu y tamién los faen gociar.
Y nun lo duldéis, llevá-ylos a cuentacuentos, acostumaránse a socializar con otros rapazos, a abrir les oreyes a mundios d’ilusión y consiguir un gustu personal pa futures escoyetes de llibros.
La llectura enancha la cultura y abre la mente. Una persona que llee llogrará una felicidá infinita.