Suscríbete

Contenido exclusivo para suscriptores digitales

Entama “Escolinos”, un espaciu selmanal pa movese n’asturianu

“Escolinos” ye una batura, un espaciu enllenu d’idees y propuestes, un abellugu bien afayaízo p’averanos a les llingües autóctones d’Asturies. Tolos martes del cursu, esti requexín ha dar voz a los escolinos, a eses neñes y neños que deprenden na escuela y xueguen nel patiu, que cuerren y falen y nun son a parar. Les propuestes de los docentes y les lleiciones entren dafechu nesta batura. Demientres, la lliteratura escuca pela ventana y la música emerxe cual barcu pirata.

Ente enguedeyos, semeyes y testos, “Escolinos” nun ye más qu’un espaciu llibre p’amosar la bayura d’actividaes que empleguen la llingua asturiana como vehicular y ensin torgues, que lo faen pa dar visibilidá a un idioma minorizáu y pequeñu pero con valir y entidá pa falar de too. “Escolinos” naz al empar del cursu escolar, el mesmu día que l’alumnáu de Secundaria y Bachilleratu entra otra vez pela puerta de los institutos. Aporta güei, cuando l’alumnáu de Infantil y Primaria lleva cuatro díes nes aules. Y entá tán, pasín a pasu, avezándose al nuevu cursu.

Nunes selmanes, too sedrá como enantes. Habrá tiempu pa xugar nel aula, pa medrar, pa deprender eses regles qu’ayuden a exercitar la memoria como esi palabru que diz “enladeelpaquemetese” y que val pa conocer les sílabes qu’apostrofen n’asturianu. Depués, l’alumnáu recordará les contraiciones, deprenderá que la “j” nun esiste, y qu’hai delles variantes d’asturianu, qu’unes faen plurales femeninos finaos en “-es” y otres lu faen en “-as”. Mentantu, los más pequeñinos esfrutarán en clas deprendiendo cola seronda, col so amagüestu, col fríu del iviernu y d’avientu, cola primavera na que tán enllenos de flores los matos y da gloria oyer los ñerbatos cantar. Asina que, xentiquina avérate a esti mundu y camienta que “Escolinos” ye una batura na que hai tiempu pa imaxinar, pa esfrutar, pa sintir y pa conocer eses pequeñes hestories que tán escrites nuna llingua, que vien del llatín, y que camudó hasta convertise nel idioma col que xurde esti abellugu. Entama “Escolinos”.

Compartir el artículo

stats