Deprender y espoxigar n’asturianu

“Acuto” ye una palabra clave, “un términu venceyáu a lo infantil y al xuegu”. Dizlo Félix Fernández que vio la necesidad va un par de años de “acutar un vacíu: diseñar productos n’asturianu pa neños y neñes”. Esi proyeutu recibió el nome d’ “Acuto”en 2019 y foi, adulces, espoxigando hasta comprobar “que los xuegos n’asturianu tienen bona acoyida”. Pasín ente pasu, Fernández texó una rede, en casa coles sos fíes, Llara y Deva, y na sociedá pa diseñar propuestes afayadices pa lo más piquiñino de casa, para la xente menudo. “Lo primero que fixi foi el ‘Xuegu de les pareyes’ y escosóse pronto, nun dio tiempu a ponelu nos puntos de venta y fixera unos 300 exemplares”, desplica l’avilesín que depués dió-y por crear un rompecabeces de quince pieces de les estaciones del añu: primavera, branu, seronda y iviernu. “Vendiéronse bien, entós ye qu’hai demanda, y venímonos arriba”, defende ente rises. D’entós p’acó, Fernández tien más de cinco propuestes diferentes y una p’adultos, el “¿Cuála ye?” y yá ta cola viniente, un nuevu xuegu sobre mitoloxía. Y too, n’asturianu. Amás, averóse al gallego-asturianu y como en Galicia, malapenes, diz, hai ufierta de xuegos infantiles, tamién camentó idear propuestes en gallegu. “Tamién con ésitu”, desplica.

“L’ociu ye una de las principales armes pa normalizar la llingua asturiana y más pa los nenos, la historia ye deprender xugando y averase asina al idioma”, afondó Félix Fernández, que tuvo que recurrir al “crowfunding” pa financiar los sos proyectos. Nel caberu, el del “¿Cuála ye?” más de 7.000 persones sofitaron el proyeutu.

Pa los sos proyeutos, l’avilesín cuntó colos servicios de normalización llíngüística nos conceyos, con dellos artistes como’l corveranu de Cancienes “Cuinchi” que punxo color y dibuxos a delles de les sos creaciones. Tamién dellos nomes venceyaos a diverses xeres culturales aportaron el so granín de sable nun mundu en que l’asturianu taba arrequexáu. “’El dominó d’animales’, por exemplu, tien una bona utilidá llinguística, porque cada animal ta venceyáu a un nome y al so soníu, ente otres cualidaes”, diz Fernández, que en 2019 recibió ayudes del Principáu al fomentu del emprendimientu innovador qu’abrió la Conseyería d’Industria y Empléu.

A esti emprendedor dieron-y xuegu los xuguetes. “Veía los xuegos de les neñes en casa d’aquella y dime cuente de la so utilidá llingüística, yera restolar términos n’asturianu, venceyalos con dibuxos y al lleer, casi ensin sabelo, deprendíes vocabulariu”, comenta Fernández, que vio nes sos fíes una inspiración p’arrancar “Acuto”. “Elles son les profesionales nos xuegos, si-yos prestaba ye que tabemos faciéndolo bien”, comenta Fernández, que tien claro que una simple entruga a Llara y Deva abre un nuevu mundu de posibilidaes. “Fueron elles les encargaes de la escoyeta d’animales del dominó y les que escueyen tamién el de mitoloxía, que ta por vinir, xuego con elles y elles participen na creación”, afonda el padre d’”Acuto”.

Y como les propuestes infantiles furrulaben, Félix Fernández dió un pasu más. Averóse al mundu del ociu adultu. Faló con non poques persones pa crear el primer trivial n’asturianu. “Foi muncha xente con conocimientos en toles estayes de la cultura asturiana”, desplicó.

Agora, el padre d’ “Acuto” ya piensa na mitoloxía, nel so nuevu universu infantil, en xuegos colos qu’allumar un camín pa que la reciella deprenda palabres “pa normalizar una llingua que quier espoxigar”.