Que Halloween ye una de les fiestes más esperaes polos más pequenos yá nun ye una novedá. Y que l’amagüestu ye una de les fiestes más tradicionales d’Asturies tamién ye bien sabío. Por eso, nel Institutu Roces, en Xixón, decidieron dir un pasu más allá y fundir les dos cites, nuna xornada qu’ellos mesmos bautizaron como “Terrorgüestu”, una actividá qu’entemez los terroríficos disfraces de Halloween cola tradicional degustación de castañes y sidra dulce, tan avezada por estes feches de la seronda.
El programa festivu entamólu’l personal docente del centru y l’asociación de madres y padres. Tien una induldable popularidá ente l’alumnáu, que disfrutó’l pasáu xueves, primero de marchar de ponte, d’entemecer les tradiciones anglosaxones coles locales. El programa ellaboráu pol Institutu de Roces entamó un bon puñáu d’actividaes nes que participaron los escolares. Una de les más destacaes foi’l concursu de vidios y microrrelatos. Pero tamién s’entamó un concursu de puertes encantaes que consistió en que los estudiantes fueron decorando de delles maneres les puertes de les clases.
Amás de too eso, hubo un pasaxe del terror, iniciativa que fixeron los padres y madres del institutu. Tantu s’esfronaron dende l’AMPA, que más d’ún llevó un “bon surtíu”, como apunten dende l’Institutu de Roces. Per esti pasaxe del terror pasaron tolos alumnos del centru. Como complementu a tola cita, los alumnos de cuartu de la ESO pudieron poner en práctica’l vocabulariu de Halloween, emplegando les distintes llingües europees que s’enseñen nel institutu. Pela so parte, los alumnos de segundu ciclu d’Animación Sociocultural fixeron un taller n’inglés pa la realización de motivos decorativos. Per Roces tamién fueron desfilando los malos de les películes de Disney gracies a los disfraces que fixeron los estudiantes de los distintos ciclos formativos del centru.
Como complementu a la xornada, l’alumnáu del Institutu de Roces tamién aprendió alternatives al usu del plásticu gracies al programa “Ecoroces”, centráu en prevenir el cuidáu de la salú na comunidá educativa. Neses alternatives al usu de plásticos, los alumnos tuvieron que llevar el so propiu vasu reutilizable pa beber la tradicional sidra dulce. Un xugu la mazana que, xunto a les castañes típiques d’Asturies nestes feches, sirvió pa vivir nel Institutu de Roces un día de mieu gracies a los disfraces de Halloween.
